Промышленнэ продукциер шъолъырым хэбзэнчъэу къыщырамыгъэкIокIыным фэгъэзэгъэ республикэ комиссием изэхэсыгъоу тыгъуасэ щыIагъэм тхьамэтагъор щызэрихьагъ Адыгеим и ЛIышъхьэу КъумпIыл Мурат.

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, республикэм и Премьер-министрэу Геннадий Митрофановыр, министрэхэм я Кабинет хэтхэр, нэмыкIхэри.

Iэзэгъу уцхэр ыкIи промышленнэ товархэр хэбзэнчъэу къырамыгъэкIокIынхэм фэшI Iофэу ашIэрэм, щэм хэшIыкIыгъэ продукцием икъыдэгъэкIын ыкIи ищэн шапхъэхэм адештэмэ гъэунэфыгъэным епхыгъэ уплъэ­кIунхэм язэфэхьысыжьхэм къэ­зэрэугъоигъэхэр атегущыIагъэх.

Адыгеим псауныгъэр къэухъу­мэгъэнымкIэ иминистрэу Мэрэтыкъо Рустемрэ Росздравнадзорым АдыгеимкIэ и ГъэIорышIапIэ ипащэу Шымыгъэхъу Айтэчрэ къызэраIуагъэмкIэ, 2020-рэ илъэсым бэдзэогъум и 1-м щыублагъэу ащэрэ Iэзэгъу уцхэм шIокI имыIэу маркировкэ атетын фае. Непэрэ мафэм ехъулIэу шъолъырым ифармацевтическэ организациехэр зэкIэ мы системэм техьагъэх. УплъэкIунхэм къызэрагъэлъэ­гъуа­гъэмкIэ, Iэзэгъу уцхэм япроценти 5-р шапхъэхэм адимыштэу аIыгъыгъэх.

Iэзэгъу уцхэм якъегъэкIокIын хэлэжьэрэ предприятиехэм ыкIи организациехэм япшъэрылъхэр зэрагъэцакIэхэрэм пытагъэ хэлъэу лъыплъэгъэн, ищыкIагъэ хъумэ хэбзэухъумэкIо къулы­къухэри а IофшIэным къыхэ­гъэлэжьэгъэнхэ зэрэфаер АР-м и ЛIышъхьэ хигъэунэфыкIыгъ.

— Шапхъэхэм адимыштэрэ Iэзэгъу уцхэм ыкIи медицинэ препаратхэм тицIыфхэр ащытыухъумэнхэ, шапхъэхэр зыукъохэрэм пытагъэ хэлъэу пшъэдэкIыжь ядгъэхьын фае, — къыхигъэщыгъ КъумпIыл Мурат.

Шапхъэхэм адимыштэрэ промышленнэ продукциер Адыгеим къырамыщэным фэшI Краснодарскэ таможнэм иIофшIэн зэрэзэхищэрэм зэхэсыгъом хэлэжьагъэхэр тегущыIагъэх. Анахьэу тутыныр хэбзэнчъэу къырагъэкIокIэу къызэрэхагъэщырэр къаIуагъ. Мы лъэны­къомкIэ таможнэм ипащэхэм республикэ МВД-м, прокуратурэм, хэбзэIахь къулыкъухэм язэдэлэжьэн нахь агъэпытэн фаеу КъумпIыл Мурат ылъы­- тагъ.

Роспотребнадзорым АР-мкIэ и ГъэIорышIапIэ ипащэу Сергей Завгороднем къызэриIуагъэмкIэ, блэкIыгъэ илъэсыр пштэмэ, щэм хэшIыкIыгъэ продукциер къы­дэзгъэкIырэ объекти 5-мэ ыкIи сатыушIыпIэ 62-мэ алъэныкъокIэ уплъэкIунхэр зэхащагъэх. Административнэ Iофи 6 къызэIуа­хыгъ, лажьэ зиIэу агъэунэфыгъэ нэбгырэ 31-мэ тазырхэр атыралъхьагъэх.

Щэм хэшIыкIыгъэ продукцием, анахьэу адыгэ къуаем, изытет ренэу уплъэкIугъэн зэрэфаер республикэм и ЛIышъхьэ къы­Iуагъ.

— Тишъолъыр бренд къэтыухъумэн фае. Адыгэ къуаер шэпхъэшIухэм адиштэным тэркIэ мэхьанэ­шхо иI, мы продукциер къыдэзгъэкIы­хэрэм я Ассоциацие ащ лъып­лъэн фае, — къы­Iуагъ респуб­ликэм ипащэ.

Джащ фэдэу республикэм исоциальнэ ыкIи гъэсэныгъэм иучреждениехэм аIэкIагъэхьэрэ гъомылапхъэхэм язытет шап­хъэхэм адиштэным анаIэ тырагъэтын зэрэфаер Адыгеим и ЛIышъхьэ къыхигъэщыгъ. УФ-м и Президентэу Владимир Путиным кIэлэеджакIохэм ягъэ­шхэнкIэ пшъэрылъэу къыгъэуцугъэм игъэцэкIэн пстэуми анаIэ тырагъэтын зэрэфаер къыкIигъэтхъыгъ.