КоронавирусыкIэу дунаир зэлъызыкIугъэм пэшIуекIорэ вакцинэр цIыфхэм ахэлъхьэгъэным епхыгъэ Iофхэм афэгъэхьыгъэ зэхэсыгъом УФ-м и Президентэу Владимир Путиным зэпахырэ узым зызэриушъомбгъурэр къызэрэзэтеуцуагъэр къыщыхигъэщыгъ. Ащ пэшIуекIорэ вакцинэу «Спутник V» зыфиIорэр зищыкIагъэу къыкIэупчIэрэ къэралыгъохэм япчъагъэ зэрэхахъорэр къыкIигъэтхъызэ, зыпарэми къаигъагъэкIэ рагъэштэнэу ыуж зэримыхьагъэхэри къыIуагъ.

—ШIэныгъэ-ушэтыпIэ учреждениехэм яшIэныгъэлэжьхэм, зэкIэ псауныгъэм икъэухъу­мэн исистемэ щылажьэхэрэм яIофшIэн федэ къытэу зэрэзэхащагъэм ишIуагъэкIэ коронавирусым зызэриушъомбгъурэр къызэ­тедгъэуцон, нэбгырэ миллион пчъагъэмэ япсауныгъэ ыкIи ящыIэныгъэ къэтыухъу­мэн тлъэкIыгъ, — къыIуагъ Владимир Путиным.

Эпидемиологием ылъэныкъокIэ Iофхэр нахьышIу хъунхэм анахьыбэу фэIорышIагъэхэм ащыщ коронавирусыкIэм пэшIуе­кIорэ вакцинэхэр цIыфхэм ахалъхьанхэу зэрэрагъэжьагъэр. Прививкэр IахьитIоу гощыгъэу зы нэбгырэм халъхьан фаеу щыт. Урысыем щыпсэоу апэрэ Iахьыр зыхалъхьагъэр нэбгырэ миллиони 6,3-рэ мэхъу, вакцинэр зэрэщытын фаем фэдизэу зыIэкIэхьагъэр нэбгырэ миллиони 4,3-р ары.

— Урысыем къыщашIырэ вакцинэхэм цыхьэ афэпшIынэу зэрэщытыр, зэрэмыщынагъохэр теубытагъэ хэлъэу къэтIон тлъэкIыщт, щыIэныгъэми ар къыгъэлъэгъуагъ. Ары пакIошъ, нэмыкI IэкIыб къэрал вакцинэхэм ащ фэдэу инэу цIыфыр къэзыухъумэрэ ахэтэп, — къы­Iуагъ Владимир Путиным.

Къэралыгъоу Урысыем къыщашIырэ вакцинэхэр зищыкIагъэхэм япчъагъэ хахъоми, тихэгъэгу исхэм ящыкIагъэм фэдизыр аIэкIэгъэхьэгъэныр анахь шъхьа­Iэу зэрэщытыр, цIыфхэр прививкэ зэрашIыхэрэм нахь хэгъэхъогъэным мэхьанэшхо зэриIэр Президентым къы­кIигъэтхъыгъ. Иммунитетыр коллективнэу хъумэ ары зэпахырэ узэу дунаир зэлъы­зыкIугъэм тызытекIощтыр. Ащ тыкъе­кIолIэным нахь чанэу ыуж итынхэу къэралыгъом ипащэ Iофым фэгъэзагъэ­хэм къафигъэпытагъ.

Зэпстэур зыпкъ иуцожьыным пае зыныбжь икъугъэу къэралыгъом исым ипроцент 60-м къыщымыкIэу вакцинэр ахэлъхьэгъэн фае. Ащ комплект миллион 68,8-рэ ищыкIагъ. Президентым къы­зэриIуагъэмкIэ, ищыкIагъэм фэдизыр къыдагъэкIынэу амал яI.

— Вакцинэр зыхаригъэлъхьащтми зыхаримыгъэлъхьащтми нэбгырэ пэпчъ зэрэшIоигъу, зыфаер къыхихынэу фитыныгъэ иI. Сэ мары неущ зыхязгъэлъхьан гухэлъ сиI, — къыIуагъ Владимир Путиным.

Къэралыгъом ипащэ зыфиIуа­гъэр тыгъуасэ ыгъэцэкIэжьыгъ. Ар УФ-м и Президент ипресс-сек­ретарь къыушыхьатыжьыгъ, Урысыем къыщыдагъэкIырэ вакцинищым язырэр Владимир Путиным зыхаригъэлъхьагъ.