Партиеу «Единэ Россиер» кIэщакIо зэрэфэхъугъэм тетэу цIыфхэм IофшIэн яIэн зэрэфаем фэгъэхьыгъэ законопроектым джыдэдэм зэрэхэгъэгоу щытегущыIэх. Партийнэ дискуссиеу гъэтхапэм и 18-м щыIагъэм шъолъырхэм япащэхэр, Урысыем IофшIэнымкIэ ыкIи социальнэ ухъумэнымкIэ и Министерствэ, профсоюзхэм ялIыкIохэр хэлэжьагъэх. Документым ятIонэрэу хаплъэхэ зыхъукIэ, ащ къыщахьыгъэ предложениехэр къыдалъытэщтых.

Партием и Генеральнэ совет исекретарэу Андрей Турчак зэрэхигъэунэфыкIыгъэмкIэ, цIыф­хэм IофшIапIэ къафэзыгъо­тырэ гупчэхэр джырэ шапхъэ­хэм ади­штэу зэтегъэпсыхьэгъэн­хэ, чэзы­ум хэмытхэу, яунэ зэрис­хэу, справкэ пчъагъэ къыдамыхэу лэжьэпкIэ дэгъу къазыщаратыщт IофшIапIэ цIыфхэм къагъотынымкIэ амал­хэр къэралыгъом зэрихьанхэ фаеу ащ елъытэ.

ГущыIэр зыфэгъэхьыгъэр цIыфхэм IофшIэн къафэзыгъотыщт цифрэ къулыкъоу порталэу «Работа в России» зыфиIорэр зиIэубытыпIэщтыр зэхэщэгъэныр ары. Нэбгырэ 25-м ехъу зыIут организациехэм IофшIэпIэ чIыпIэ нэкIэу яIэхэм, сэкъатныгъэ зиIэхэм атегъэпсыхьэгъэ IофшIэпIэ чIыпIэхэу яIэхэм афэгъэхьыгъэ къэбархэр порталым ра­гъэхьанхэ фае.

Андрей Турчак зэрилъытэрэмкIэ, порталэу «Работа в России» зыфиIорэмкIэ фэIо-фашIэу зэ­шIуа­хыхэрэм зягъэушъомбгъу­гъэн фае. Еджэхэ зэрашIоигъом­кIэ лъэIу тхылъхэр ащкIэ аIэкIагъэхьашъоу, гъэсэныгъэу яIэр къэзыушыхьатырэ дипломхэм яшъыпкъагъэ агъэунэфышъоу, видеоинтервью аIахышъоу щытыгъэмэ дэгъугъэ.

IофшIэным икъэгъотынкIэ IэпыIэгъу зыфэхъухэрэмкIэ сэ­къат­ныгъэ зиIэхэр апэ игъэшъы­гъэнхэ фаеу Генеральнэ советым исекретарь елъытэ. IофшIэн къязытыхэрэм хьакъулахьхэм ятынкIэ фэгъэкIотэныгъэ зафа­шIыщтыр зипсауныгъэкIэ щыкIагъэ зиIэхэр IофшIапIэм зашта­хэкIэ ары. Партиеу «Единэ Россием» и Калужскэ шъолъыр къутамэ исекретарэу, губернаторэу Владислав Шапша зэрэхигъэунэфыкIыгъэмкIэ, апшъэрэ еджапIэхэр къэзыухыгъэхэу зыныбжь илъэс 25-м шъхьадэмыкIыгъэхэри IофшIэным икъэгъотын къин дэзылъэгъухэрэм ахэлъытэгъэнхэ фае. Ащ фэдэу зыхъукIэ, ахэм шъолъырхэм IэпыIэгъу къащаратын, пIалъэ горэм телъытэгъэ IофшIэн къафагъотын алъэкIыщт. Джыдэдэм ащ фэдэ IэпыIэгъу зэратыхэрэр профтехучилищхэр къэзыухыгъэ­хэу илъэс 18-м къыщегъэжьа­гъэу илъэс 20-м нэс зыныбжьхэу зыкIи Iоф зымышIагъэхэр ары. Профсоюзхэм ялIыкIохэм а предложением къыдырагъэштагъ. Ахэм къызэраIуагъэмкIэ, опыт зэрямыIэм епхыгъэу специалист ныбжьыкIабэ IофшIапIэмэ аштэрэп.

Партиеу «Единэ Россием» хэтхэм джащ фэдэу игъо алъэгъу IофшIэн зимыIэхэу официальнэу зязыгъэтхыгъэхэм сэнэ­хьат горэ аIэ къырагъэхьэфэ, еджэхэфэ нэс ахъщэ IэпыIэгъоу къаратыщтыгъэр къафагъэнэжьы­нэу, заказкIэ Iоф зышIэхэрэм яфэIо-фашIэхэри цIыфхэм Iоф­шIэн къафэзыгъотырэ къулыкъу­хэм къафагъэцэкIэнхэу.

«Ащ фэдэ щыкIагъэр дэ­гъэзыжьыгъэн, заказкIэ Iоф зы­­шIэхэу хьакъулахь зыты­хэрэми IэпыIэгъу ягъэгъотыгъэн фае», — къыIуагъ «Единэ Россием» ифракциеу Къэралыгъо Думэм щыIэм ипащэ иапэрэ гуадзэу Андрей Исаевым.

Ащ зэрэхигъэунэфыкIыгъэмкIэ, Урысыем экономикэ хэхъо­ныгъэмкIэ и Министерствэ къы­зэ­ритыгъэмкIэ, заказкIэ Iоф зышIэхэрэм япчъагъэ 2024-рэ илъэсым ехъулIэу миллиони 2,5-м къыщыкIэщтэп.

Шъугу къэтэгъэкIыжьы цIыф­хэм IофшIэн яIэн зэрэфаем фэ­гъэхьыгъэ законым фашIыгъэ гъэтэрэзыжьынхэр «Единэ Россием» 2021-рэ илъэсым мэзаем и 18-м Къэралыгъо Думэм зэрэ­рихьылIагъэхэр. Ахэр къагъэхьазырынэу пшъэрылъ къафэзышIыгъэр партием и Тхьаматэу Дмит­рий Медведевыр ары. ЦIыфхэм IофшIэн къафэзыгъотырэ шъолъыр гупчэхэм яполномочиехэр федеральнэ къулыкъухэм афагъэзэжьынхэу мы законопроектым къыщыдэлъытагъ. Арэущтэу зыхъукIэ, IэкIыб къэралыгъохэм къарыкIыхэрэр арымырэу, Урысыем исхэм апэрэ чэзыоу IофшIэн агъотыщт. «Единэ Россием» ифракциеу Къэралыгъо Думэм щыIэм ипащэу Сергей Неверовыр Президентэу Владимир Путиным зыIокIэм, цIыфхэм IофшIэн яIэн зэрэфаем фэгъэхьыгъэ законым фашIыгъэ гъэтэрэзыжьынхэм япхырыгъэкIын фракцием лъэшэу ынаIэ зэрэтыригъэтыщтыр ри­Iуагъ. Къэралыгъом ипащэ партием пшъэрылъ фишIыгъ Правительствэм игъусэу IофшIэн къафэзыгъотырэ гупчэхэм яшап­хъэ­хэм якъыхэхын епхыгъэ Iофыгъом дэлэжьэу.