ГъогурыкIоным хэлажьэхэрэм апае къэтынхэр радиостан­циеу «Урысыем ирадио. Адыгеир» зыфиIорэм иэфир икIыгъэ илъэсым къихьагъэх. Щынэгъончъагъэр ащ­кIэ агъэпытэ.

Джы мыгъэ а къэтынхэр радиостанциеу «Говорит Майкоп» зыфиIорэм къытыщтых. Апэрэ едзыгъор гъэтхапэм и 10-м щыIагъ. Лъэпкъ проектэу «Щынэгъончъэ ыкIи шэпхъэшIу­хэм адиштэрэ автомобиль гъогухэр» зыфиIоу пхыращырэм мы къэбар программэхэр къыдыхэлъытагъэх.

ГъогурыкIоныр щынэ­гъончъэнымкIэ хэбзэгъэуцугъакIэу къежьэхэрэм, тишъолъыр гъогу хъугъэ­-шIагъэу къыщыхъухэрэм, пэшIорыгъэшъ ыкIи ра­диокъэтынэу «Формула безопасности» зыфиIорэм къыдыхэлъытэгъэ Iоф­тхьабзэхэм афэгъэхьыгъэ къэ­бархэр автомобилыр зезыфэхэрэм ыкIи ащ къадисхэм, лъэсрыкIохэм зэхахыщтых.

Апэрэ къэтынэу гъэ­тха­пэм и 10-м щыIагъэм ихьэкIагъ Адыгеим и Къэ­ралыгъо автоинспекцие пропагандэмкIэ иотдел ипащэу Бзэджэжъыкъо Мурат. Радиокъэтынэу «Яблочное утро» зыфи­Iорэм изещакIохэм упчIэ гъэшIэгъоныбэ къагъэ­хьа­зырыгъ.

Ащ ыуж къыкIэлъыкIогъэ къэтыныр ешъуагъэу автомобилыр зезыфэхэрэм афэгъэхьыгъагъ. Мыщ къытегущыIагъ АР-м и Къэралыгъо автоинспекцие иотдел ипащэу Алексей Чмыревыр.

Радиом иамалхэмкIэ тигъогухэм щынэгъончъагъэр ащыгъэпытэгъэныр автоинспекцием ипшъэ­рылъ­хэм зэу ащыщ. Тематическэ программэу «Формула безопасности» зыфиIорэр джыри тапэкIэ «Говорит Майкоп» зыфи­Iорэм иэфир къихьащт.