КIэлэцIыкIухэмрэ зихэхъогъухэмрэ къэухъумэгъэнхэу…
УФ-м и Президентэу Владимир Путиныр Iофтхьабзэу «Мы вместе» зыфиIорэм хэлажьэхэрэм заIокIэм кIэлэцIыкIухэмрэ зихэхъогъухэмрэ щынагъохэм ащыухъумэгъэнхэр пшъэрылъ шъхьаIэхэм зэращыщыр къыкIигъэтхъыгъ.
Интернет нэкIубгъохэр агъэфедэхэзэ зихэхъогъухэм аIэ зытыращэежьыным, заукIыжьыным фэзгъэчэфыхэрэм пхъашэу ягугъу къышIыгъ, «цIыф теплъаджэхэкIэ», «хьэцIэ-пIэцIэ цIыкIукIэ» яджагъ.
Къэралыгъом ипащэ интернетыр щыIэныгъэм пытэу зэрэхэуцуагъэр къыхигъэщыызэ, юридическэ шапхъэхэм ямызакъоу, моралым къыгъэуцурэ хабзэхэми ар адимыштэмэ, обществэр зэхигъэтэкъунэу зэрэщытыр къыкIигъэтхъыгъ. ГухэкIми, интернет нэкIубгъохэм кIэлэцIыкIухэмрэ зихэхъогъухэмрэ мыхъун ашIэным фэзыгъасэхэу, фэзгъэчэфыхэу арыплъагъорэр бэ. Президентым къызэриIуагъэм тетэу, ежьхэм яфедэ пае кIэлэцIыкIухэр агъэфедэх.
— А цIыф теплъаджэхэм интернет нэкIубгъом арысхэу пшъэшъэжъые цIыкIур е шъэожъыер унашъхьэм къепкIэхыным фагъэчэф зыхъукIэ бэлахьых, зэрагъафэзэ сабыйхэр зэрэзекIощтхэр къафаIуатэ, ау полициер алъыIэсэу зашъхьащыхьэкIэ, нэмыкI шъыпкъэ къэхъух. Ащ фэдэхэр угу ямыгъоу ппIыртIыжьынхэ фае. Ахэм етIани ащкIэ ахъщэ къагъахъэ. Ар афэтыдэ хъунэу щытэп, — къыIуагъ Владимир Путиным пхъашэу.
Хэгъэгум инеущырэ мафэкIэ а зэпстэумэ щынагъо къызэратырэр, ныбжьыкIэхэм ящыIэныгъэ анахь чIыпIэ ин щызыубытын фаер къыхамыхышъуныр зэрэтхьамыкIагъор, ащ нахьыжъхэм ямысагъэ зэрэхэлъыр зэкIэми къыдгурыIон фаеу зэрэщытыр Президентым къыхигъэщыгъ.
Джащ фэдэу УФ-м и Президент хэгъэгу кIоцI IофхэмкIэ Министерствэм иколлегие изэхэсыгъо зыхэлажьэми, политикэм щылъыкIуатэмэ зышIоигъохэм е мылъкум лъыбанэхэрэм ащыщыбэхэм кIэлэцIыкIухэр зэрагъэфедэхэрэм ипчъагъэ нахьыбэ зэрэхъугъэм анаIэ тыраригъэдзагъ.
— ТихэгъэгукIэ тисабыйхэр анахь лъапIэхэшъ, ащ фэдэ зышIэхэрэми афэтыдэ хъущтэп, — къыкIигъэтхъыгъ къэралыгъом ипащэ.
МВД-м ыкIи нэмыкI хэбзэухъумэкIо къулыкъухэм яIофышIэхэм интернет нэкIубгъохэр нахьыбэрэ ауплъэкIунхэу, кIэлэцIыкIухэмрэ зихэхъогъухэмрэ бзэджэшIагъэхэр зэрахьанхэм фэзыщэхэрэм якъычIэгъэщын нахь гъэлъэшыгъэу Iоф дашIэнэу, шапхъэхэм адимыштэу урамхэм ащызэхащэрэ Iофтхьабзэхэм ахэлэжьэнхэу къяджэхэрэм хэбзэгъэуцугъэм диштэу пшъэдэкIыжь арагъэхьынэу къафигъэпытагъ.