Гъэтхапэм и 19-м клиентым и Дунэе мафэ хагъэунэфыкIыгъ. «ЭкоЦентрэри» ащ хэлэ­жьагъ, мы мафэм офис­хэм къяолIагъэхэм афэгушIуагъэх, шIухьафтынхэр аратыгъэх.

— Шъолъыр операторым цIыфэу Iоф зыдишIэхэрэм зэкIэми афэразэу «тхьашъуегъэпсэу» ареIо. Ахэм зэпхыныгъэу къыддыряIэм ишIуагъэкIэ фэIо-фашIэхэм ягъэцэкIэн нахьышIу тшIын тлъэкIыгъ. Тыкъэзыуцухьэрэ дунаим, чIыопсым икъэгъэнэжьын зынаIэ атетхэм зэкIэми тирэзэныгъэ афитэIотыкIы, — къыIуагъ «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Республикэм щыпсэоу нэбгырэ мин 460-м ехъумэ хэкIым идэщынкIэ фэIо-фашIэхэр шъо­лъыр операторым афегъэцакIэх. Мафэ къэс нэбгыри 100 фэдизмэ менеджерхэм закъыфагъазэ. Ахэм упчIэ зэфэшъхьаф­хэр къатых, гумэкIыгъохэр яIэх. ЗэкIэми джэуап аратыжьы, зищыкIагъэм деIэх.

ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу.