Псэолъи 138-рэ

2021-рэ илъэсым тызыхэхьагъэм къыщегъэжьагъэу Адыгеим имэкъумэщ хъызмэт епхыгъэу псэолъи 138-мэ «Россети Кубань» зыфиIорэм электроэнергиер арищэлIагъ. ПстэумкIи зэхэтэу ар мегаватти 8,1-рэ мэхъу.

Электричествэр зэратыгъэхэм ащыщых Джэджэ районымкIэ щэм хэшIыкIыгъэ гъомылапхъэхэр къыдэзыгъэкIырэ заводитIур, АдыгэкъалэкIэ лэжьыгъэ IыгъыпIэр, Красногвардейскэ, Кощ­хьэблэ ыкIи Шэуджэн районхэм ямэкъумэщ хъызмэтшIапIэхэр, унагъохэм ящагу хъызмэтхэр.

Республикэм имэкъумэщ комплекс лъэшэу зеушъомбгъу, арышъ, иинфраструктури хэхъоныгъэхэр егъэшIыгъэнхэу ищыкIагъ. ХъызмэтшIапIэхэм электроэнергием пае лъэIу тхылъ къызатыкIэ, охътэ кIэкIым ар афигъэпсыным компаниер фэхьазыр зэпыт. Электричествэр зищыкIагъэхэм икъоу аIэкIигъэхьаным пае республикэм иэлектросетьхэм заригъэушъомбгъунышъ, кIуачIэу яIэм джыри мегавольт-ампери 195-рэ 2023-рэ илъэсым нэс хигъэхъонэу гухэлъ иI.

Мары мы тызыхэт 2021-м подстанциеу «Адыгейская» зыфиIорэм киловатти 110-кIэ, «Кужорскэм» киловатт 35-кIэ акIуачIэ нахьыбэ ышIынэу ыгъэнэфагъ. КъэкIощт 2022-рэ илъэсым «Черемушки, «Северная», «Инэм», «Комбизавод», «Тульская», «Садовая» зыфиIорэ подстанциехэр агъэкIэжьыщтых.

Шъугу къэдгъэкIыжьын, 2018 — 2020-рэ илъэсхэм респуб­ликэм иэлектросетьхэм язегъэушъомбгъун сомэ миллиардым ехъу «Россети Кубань» пэIуигъэхьагъ. «Счетчик Iушэу» мин 45,6-рэ зегъэуцум, чIэнагъэу ышIырэр киловатт миллиони 103-кIэ нахь макIэ хъугъэ. Ар ахъщэкIэ къэплъытэмэ, сомэ миллион 370-рэ фэдиз мэхъу.

(Тикорр.).