Мыекъопэ районым ит псэупIэу Краснооктябрьскэм дэт IэзапIэм, врач шъхьаIэр ахэтэу, нэбгырэ 17-у щылажьэхэрэр зэкIэмкIи нэбгырэ минипшI зыдэс псэупIэ зэфэшъхьафхэу поселкэм къегъэтIысэкIыгъэхэм япсауныгъэ изытеткIэ IэпыIэгъу афэхъух.

Врач шъхьаIэу Дмитрий Волковым иIофышIэхэм, ахэм янахьыбэр бзылъфыгъэх, япшъэ­рылъхэр икъоу зэрагъэцэкIэшъу­хэрэр хегъэунэфыкIы.

Пандемием иуахътэ, зэкI пIоми хъунэу, чэзыу-чэзыоу ко­видкIэ сымэджагъэх нахь мышIэми, къыдэкIыжьыхэзэ IофшIэныр лъагъэкIуатэщтыгъэ, IэзапIэм джыдэдэми цIыфыбэ щызэблэкIы, псэупIэхэм адэс нэжъ-Iужъхэм, ныбжь гурыт зиIэхэм ямыза­къоу, сабыйхэри къащэх, кIэлэцIыкIу­хэмкIэ врачым ахэм япсауныгъэ изытет гъунэ лъефы. Краснооктябрьскэм имызакъоу, Дагестанскэм, Мирнэм, Курджипскэм, Табачнэм, Безводнэм ащыпсэухэрэм врач шъхьаIэр дэгъоу ашIэ, яупчIэжьэгъу, яцыхьы­шIэгъу. БлэкIыгъэ илъэсым, коронавирусым нахь зыкъызщиIэтыгъэгъэ лъэхъанэу чэщ-зымафэм узыр къызэолIагъэхэр нэбгырэ 90-м къехъоу къызщыхагъэщыщтыгъэ уахътэм, IэзапIэм иврач шъхьаIэрэ медсестрау Анна Потеряевамрэ ныIэп Iоф зышIэу мыщ къычIэнэжьыгъагъэр. Плъыр-стырыр къызкIэхьагъэхэм адэжьи кIощтыгъэх, амбулаторием къекIолIэрэ сыма­джэхэми яIазэщтыгъэх. А уахътэр зэкIэмэ анахь хьылъагъэу Дмитрий Волковым хегъэунэфыкIы:

— Коронавирусым цIыфхэр лъэшэу гумэкIыгъо хидзагъэх. Унэгъо псаухэр зыщысымэ­джагъэхэри ахэт. Илъэсыр зытыублагъэм щегъэжьагъэу нэбгырэ 300-м къехъу ковидкIэ сыма­джэхэу къытихьылIагъ. Джы, мэзаем щыублагъэу, къыкIичы­нэу ригъэжьагъ. Чэ­зыур пчъэм нэсэу мафэхэр къыхэкIы­щты­-гъэх. Джы мэфэныкъом нэбгырэ зытIущ къакIоми ары ныIэп. Вакцинациер тыублагъэу шIоигъоныгъэ зи­Iэхэм афэтэ- шIы. Ащ фэдэхэм япчъагъэ нэбгырэ 200-м къе­хъугъ. Прививкэр зыфэтшIыгъэ пстэуми язытет дэгъу. Зыгорэм ыгъэгу­мэкIыхэу къы­тэолIэжьы­гъэхэп.

Врач шъхьаIэм гущыIэгъу тыфэхъуфэ кабинетым нэбгырэ пчъагъэ къычIэхьагъ: зыр справкэм къыкIэлъэIу, адрэм узым икъыхэгъэщын тегъэпсыхьагъэу врачым зэригъакIорэр къэзыушыхьатырэ тхьапэ ищыкIагъ, ыпкIэ хэмылъэу уцхэр ковид сымаджэм фэзыщэщтым адресыр фитхыгъ. А зэпстэум врачым ынаIэ атетэу икабинет щызэблэкIых, инэплъэгъу зыпари аукъодыеу блэкIырэп.

Илъэс 18-рэ дзэм врачэу зэрэхэтыгъэр гъуащэрэп. Дмит­рий Волковым Куйбышев дзэ-медицинэ институтыр къыщиухыгъ, нэужым фэдэ академиеу Ленинград дэтым щеджагъ. Апшъэрэ команднэ составым хэтэу илъэс пчъагъэрэ Кишинев щылэжьагъ. Страховой медицинэ компанием итхьаматэ игуадзэу илъэс пчъа­гъэрэ Iоф ышIагъ. Кубэ, Тыгъэ­къокIыпIэ Благъэм, Абакан анэ­сынэу хъугъэ. ЩыIэныгъэм хэшIыкI фыриIэу, исэнэхьат фэшъыпкъэу, къиныгъохэр зэ­пищэ­чыным фэхьазырэу зэрэщы­тыр инэшэнэ шъхьаIэхэу елъы­тэх. Ежь Дмитрий Волковыр болгар цIыф лъэпкъым щыщ, Одесскэ хэкум къыщыхъугъ. Мыекъуапэ дэс ишъэогъу горэм дэжь зэ къызэкIом, къэлэ рэхьат зэкIужьыр ыкIи ащ къыголъ псэупIэхэр ыгу рихьыгъэх. Бэ темышIэу унагъори къыщэжьи, Краснооктябрьскэр псэупIэкIэ хахыгъ. Ар 2002-рэ илъэсыр арыгъэ. Мыекъопэ районым исымэджэщ шъхьаIэу Тульскэм дэтым мазэрэ Iоф щишIагъэу, нэужым Краснооктябрьскэ IэзапIэм иврач шъхьаIэ ашIыгъ. КъыкIэлъыкIогъэ илъэс пшIыкIуим Дмитрий Волковыр ипащэу хэхъоныгъэхэу IэзапIэм ышIыгъэхэм яшIуагъэкIэ медицинэм илъэныкъо зэфэшъхьафхэмкIэ Iоф ашIэшъу:

— Тэ Тульскэм дэт сымэджэщым тепхыгъэу тэлажьэ. Ащ иврач шъхьаIэу Алла Чернышовам ынаIэ къыттет. Терапевт пчъагъэу тызэрэлажьэрэм имызакъоу, цэ IэзапIэ, процедурнэр, мэфэ стационарыр IэзапIэм хэтых, кIэлэцIыкIухэм яплъырэ врачым кабинет шъхьаф иIэу мэлажьэ. ГумэкIыгъо шъхьаIэмэ ащыщыр гъэцэкIэжьын Iоф­шIэнхэр амбулаторием зэрищыкIагъэхэр ары. Медицинэ лэжьапIэмэ игъэкIотыгъэ гъэцэкIэжьынхэр афэшIыгъэныр къыздыхэлъы­тэгъэ къэралыгъо программэу 2025-рэ илъэсым агъэцэкIэщтым тызэрэхагъэуцуагъэр къытаIуагъ. Ар чыжьаIоми, тэ къызэрэтте­фэрэм фэдэу тылэжьэщт. Къыт­щыгугъырэ цIыфхэм япсауныгъэ икъэухъумэн тылъыплъэщт.

ЯIоф фэшъыпкъэхэу медицинэм иIофышIэхэу районхэм, цIыф псэупIэ цIыкIухэм ащылажьэхэрэм яIофшIэн къэмылъа­гъорэми, ахэми къэралыгъом, цIыф лъэпкъым апашъхьэ япшъэ­рылъхэр щагъэцакIэх. ЯIофшIэн къэзгъэпсынкIэщт, нахьышIу зы­шIыщт шапхъэхэм анэсынэу щэгугъых.

Тэу Замир.