Жъэгъэузым пэуцужьыгъэнымкIэ Адыгэ республикэ клиническэ диспансерым зэхищэгъэ Iофтхьабзэу «Белая ромашка» зыфиIорэр тыгъуасэ Лениным ыцIэ зыхьырэ гупчэм щыкIуагъ. Мыекъуапэ щыпсэухэрэм ыкIи къеблэгъа­гъэхэм ыпкIэ хэмылъэу флюорографие ашIын амал яIагъ.

— Непэрэ Iофтхьабзэм пшъэрылъ шъхьаIэу иIэр жъэгъэузым икъыхэгъэщынкIэ флюорографие уплъэкIуныр амалышIоу зэрэщытыр ягъэшIэгъэныр ары. Джащ фэдэу мы узым гумэкIыгъоу къыздихьын ылъэкIыщтыр цIыфхэм алъыдгъэIэсыным, япсауныгъэ изытет нахь лъыплъэнхэм тынаIэ тет, — къы­Iуагъ жъэгъэузым пэуцужьыгъэнымкIэ Адыгэ республикэ клиническэ диспансерым иврач шъхьаIэу Мамый Нурбый.

Адыгэ республикэ клиническэ диспансерым иIофышIэхэм къызэраIуа­гъэмкIэ, илъэс къэс цIыфхэм флюорографие ашIын фае. Хэти зыщыпсэурэ чIыпIэм епхыгъэ поликлиникэм, район сымэджэщым, жъэгъэузым пэуцужьы­гъэнымкIэ диспансерым ар ащикIун ылъэкIыщт.

Узыр хэмыужъыныхьэзэ къыхэбгъэщ­мэ, нахь гъэхъужьыгъошIу мэхъу. Мыщ фэдэ Iофтхьабзэхэм яшIуагъэкIэ цIыфхэм агу къагъэкIыжьы япсауныгъэ лъыплъэн­хэу, нахь зыфэсакъыжьынхэу.

Iэшъынэ Сусан.

Сурэтыр Iэшъынэ Аслъан тырихы­гъ.