Нахь псынкIэу зэрэбгъэпсыщтыр

IэкIыбым кIон гухэлъ зиIэ цIыфхэм ящыкIэгъэ паспортыр агъэпсыным фэшI АР-м и МВД кощын IофхэмкIэ и ГъэIорышIапIэ зыкъыфагъэзэн алъэ­кIыщт.

Мыщ икъулыкъушIэхэм шъугу къагъэкIыжьы, IэкIыб къэралыгъом шъукIонэу шъуфаемэ, ищыкIэгъэ тхьапэхэр игъом жъугъэхьазырынхэ, паспортым ипIалъэ зэримыкIыгъэм шъулъыплъэн фае.

Полицием иIофышIэхэм зэралъытэрэмкIэ, анахь псынкIэу мыр зэрэбгъэпсын плъэкIыщтыр электроннэ шIыкIэр ары. Ащ пае къэралыгъо ыкIи муниципальнэ фэIо-фашIэхэм я ЗыкI порталэу «gosuslugi.ru» зыфиIорэм шъуихьанышъ, къулыкъум тхыгъэкIэ зыфэ­жъугъэзэн амал шъуиI.

Мыщ фэдэ шIыкIэм шIогъэшхо пылъ, сыда пIомэ цIыфыр иунэ имыкIэу тхьапэхэр егъэхьазырых, джащ фэдэу фэIо-фашIэм пэIухьащт ахъщэр процент 30-кIэ нахь макI.

Паспортым игъэхьазырынкIэ упчIэ зиIэхэр Мые­къуапэ иурамэу Калининым ыцIэ зыхьырэм иунэу N 210 «В» къекIолIэнхэ алъэкIыщт, телефонхэр: (8772) 52-10-98, 52-31-34.

УплъэкIунхэр макIох

Зыныбжь имыкъугъэхэм, ныбжьы­кIэ­хэм наркотикхэр амыгъэфе­дэнхэм, ахэр бзэджэшIагъэхэм ахэщагъэхэ мыхъуным афытегъэпсыхьэгъэ пэшIо­рыгъэшъ Iофтхьабзэхэр республикэм ихэ­бзэухъумэкIо къулыкъухэм зэхащэх.

Мы мафэхэм ащ фэдэ къэбарэу къаIэкIэхьагъэр ауплъэкIузэ, Мыекъуапэ дэт шхапIэ горэм щызэрэугъоигъэхэ ныбжьыкIэхэм наркотик зыхэлъ пкъыгъохэр агъэфедэхэу къахагъэщыгъ.

Полицейскэхэм псэуалъэр къызалъыхъум, капсулхэр къагъотыгъэх. Эксперт-криминалистхэм зэрагъэу­нэфыгъэмкIэ, ахэр психотропнэ нэшанэ зиIэ пкъыгъохэу «Лирика» ыкIи «Габапентин».

ШхапIэм чIэсыгъэ нэбгыри 6-р ауплъэкIунхэу медицинэ учреждением ащагъэх. Зэфэхьысыжьхэм къызэрагъэлъэгъуагъэмкIэ, нэбгыри 3-мэ наркотик зыхэлъ пкъыгъор агъэфедагъ.

Джы мыхэм административнэ пшъэдэкIыжь ара­гъэхьыщт, Iофым изэхэфын епхыгъэу уплъэкIунхэр рагъэкIокIых.