Бзылъфыгъэр агъэпщынагъ

Мыекъуапэ щыпсэурэ бзылъфыгъэм гъогурыкIоным ишапхъэхэр пчъагъэрэ зэриукъуагъэхэм къыхэкIыкIэ тазыр­хэр къытыралъхьагъэх.

Ау ахэр ежь-ежьырэу къыпщыныжьын зилъэкIыщт пIалъэм шIокIыгъ ыкIи къызэкIигъэкIожьын фэе ахъщэми хэхъуагъ.

Административнэ хэбзэукъоныгъэм епхыгъэ унашъоу щыIэм къыпкъырыкIызэ хьыкум приставхэм я Мыекъопэ къэлэ отдел икъулыкъушIэ Iоф къызэIуихыгъ. Бзылъфыгъэр а къэбарым щигъэгъозагъ, чIыфэр игъом къызимытыжькIэ къыкIэлъыкIон ылъэкIыщтри гуригъэIуагъ. Хьыкумым иунашъокIэ гъогурыкIоныр щынэгъончъэнымкIэ Къэралыгъо автоинспекцием къытырилъхьэгъэ тазыр 70-мэ атефэрэ сомэ мини 120-рэ бзылъфыгъэм къыпщыныжьын фэягъ.

Бзылъфыгъэм автотранспортитIу тетхагъэу хьыкум приставым ыгъэунэфыгъ ыкIи ахэр ыгъэфедэнхэ фимытэу унашъо ышIыгъ.

Бзылъфыгъэм къытефэрэр игъом зэримыгъэцэкIагъэм къыхэкIыкIэ чIыфэу телъыгъэм сомэ мин 35-рэ фэдиз хэхъуагъ. Ащ ыуж ары ныIэп ахъщэр къызызэкIигъэкIожьыгъэр.

Зэнэкъокъум иапэрэ едзыгъу

Урысые зэнэкъокъоу «Юный пра­во­защитник» зыфиIорэм иапэрэ едзы­гъо изэфэхьысыжьхэр ышIыгъэх хьы­кум приставхэм я феде­ральнэ къулы­къу АдыгеимкIэ и ГъэIо­рышIа­пIэ.

НыбжьыкIэхэм яхэгъэгу шIу алъэгъоу пIугъэнхэр, ящыIэныгъэ гъогу щагъэфедэщт сэнэхьатыр къыха­хынымкIэ IэпыIэгъу афэхъугъэныр — джары Iоф­тхьабзэм пшъэрылъ шъхьаIэу иIэр.

Мы илъэсым зэхащэгъэ зэнэкъокъум къэралыгъо къулыкъушIэхэм ыкIи ГъэIорышIапIэм Iутхэм ясабыйхэр хэлэжьагъэх. Ахэм аныбжь илъэс 11-м щегъэ­жьагъэу 18-м нэсы.

ТекIоныгъэр къыдэзыхыгъэхэр Бэла ыкIи Аслан Рзаевхэр ары.

Мыхэм яIофшIагъэхэр Урысые зэнэкъокъум изэхэщэкIо комитет фагъэхьыгъэх.

Сабыйхэм якъэухъумэн и Мафэ ехъулIэу текIоныгъэр ыкIи хагъэунэфыкIырэ чIыпIэхэр къыдэзыхыгъэхэм афэгушIощтых, дипломхэр афагъэшъошэщтых.

ИзекIуакIэ зэрэмытэрэзыр гуригъэIуагъ

Джэджэ районым щыпсэурэ хъулъ­фыгъэм банкым къыIихыгъэ чIыфэр игъом римытыжьэу хэтыгъ. Ау фэтэ­рым ищэфын-щэжьын фэIо-фашIэ игъэцэкIэн иягъэ къемыкIыным фэшI ахъщэр зэкIигъэкIожьын фаеу хъугъэ.

Хьыкум приставым къызэIуихыгъэ Iофым зэритыгъэмкIэ, хъулъфыгъэм банкым сомэ мин 200 ритыжьын фэягъ. ИзекIуакIэ зэрэмытэрэзыр, хэбзэгъэуцугъэм диштэу агъэпщынэн зэралъэкIыщтыр ащ гурагъэIуагъ. Хъулъфыгъэм фэтэр зэриIэр хьыкум приставым ыгъэу­нэфыгъ ыкIи ар ыщэн зэрэфимытымкIэ унашъо ышIыгъ.

Ащ ыуж бэ тыримыгъашIэу хъулъфыгъэм ичIыфэ къыпщыныжьыгъ, ащкIэ Iофыр зэфэшIыжьыгъэ хъугъэ.

Хьыкум приставхэм я федеральнэ къулыкъу Адыге­имкIэ и ГъэIорышIапIэ ипресс-къулыкъу

НэкIубгъор зыгъэхьазырыгъэр Тхьаркъохъо Адам.