Адыгэ Республикэм и ЛIышъхьэу КъумпIыл Мурат Адыгэкъалэ имэ­рэу ЛIыхэсэ Махьмуд тыгъуасэ IофшIэгъу зэIукIэгъоу дыриIагъэм му­ниципалитетым исоциальнэ-экономикэ зытет, джащ фэдэу лъэпкъ про­ектхэм ыкIи къэралыгъо программэхэм ягъэцэкIэн зэрэщылъы­кIуатэрэм щытегущыIагъэх.

Республикэм ипащэ къызэриIуагъэмкIэ, хэхъоныгъэ ышIынымкIэ узщыгугъын фэе муниципалитетхэм Адыгэкъалэ ащыщ. Ар зыдэщыс чIыпIэри хъопсагъоу зэрэщытыр бгъэфедэн фае.

— Урысыем и Президентэу Владимир Путиным истрате­гическэ гухэлъхэу лъэпкъ про­ект­хэм ыкIи къэралыгъо программэхэм къадыхэлъытагъэхэр чIы­пIэхэм зэрифэшъуашэу ащы­­гъэцэкIэгъэнхэм тэркIэ мэ­хьанэшхо иI. Шъолъырым хэхъо­ныгъэ ышIыныр ыкIи цIыф­хэм ящыIэкIэ-псэукIэ нахьышIу хъуныр ары а IофшIэным зэфэ­хьысыжьэу фэхъун фаер. Хы ШIуцIэм екIурэ федеральнэ гъогум Адыгэкъалэ кIэрыс. Ащ къыхэкIыкIэ муниципалитетым ипшъэрылъ шъхьаIэр инвес­тор­хэмкIэ хъопсагъоу щыт пло­щадкэхэр ыгъэпсынхэр ыкIи бизнесым хэхъоныгъэ ышIыным ынаIэ тыригъэтыныр, — къы­Iуагъ КъумпIыл Мурат.

ЛIыхэсэ Махьмуд къызэрэ­хигъэщыгъэмкIэ, блэкIыгъэ илъэсым къэлэ бюджетым ахъщэ IэпыIэгъоу къихьагъэр нахь макIэ хъугъэ, процент 33,3-рэ хъущтыгъэмэ, процент 27,7-м нэс къырагъэIыхыгъ. Хэбзэ-Iахь ыкIи мыхэбзэIахь хахъохэр сомэ миллиони 105,6-рэ мэхъу. Лъэпкъ проектэу «Де­мографием» игъэцэкIэн къыдыхэлъытагъэу блэкIыгъэ илъэ­сым Адыгэкъалэ кIэлэцIыкIу IыгъыпIакIэ щатыгъ, ащ чIыпIэ 240-рэ иI. Джащ фэдэу физ­культурнэ комплекс щагъэ­псыгъ. Программэу «ШэпхъэшIу­хэм адиштэрэ къэлэ щыIакIэр гъэпсыгъэныр» зыфиIорэм къы­дыхэлъытагъэу муниципа­ли­те­тым ичIыпIэхэм язэтегъэ­псы­хьан лъагъэкIотагъ. Лъэпкъ проектэу «Культурэм» ишIуа­гъэкIэ лъэпкъ культурэм и Гупчэ гъэцэкIэжьынхэр рашIылIагъэх. Ащ нэмыкIэу федеральнэ грантым ыкIи республикэ бюджетым яIэпыIэгъукIэ саугъэт комп­лексэу «ТекIоныгъ» зыфиIорэм ыкIи ащ къыпэIулъ чIыпIэм язэ­­тегъэпсыхьан аухыгъ.

— ГъэцэкIэжьынхэм, социаль­нэ псэолъакIэхэм яшIын ыкIи язэтегъэпсыхьан адакIоу, эконо­микэм хэхъоныгъэ ышIыным, бюджетым ихахъохэр нахьыбэ шIыгъэным шъунаIэ тежъугъэтын фае. АщкIэ къалэм амалышIухэр IэкIэлъых, — къыхигъэщыгъ кIэухым КъумпIыл Мурат.

Адыгеим и ЛIышъхьэ ипресс-къулыкъу