Коронавирусым зызэриушъомбгъущтыгъэм елъы­тыгъэу унашъоу щыIагъэхэм ащыщхэм зэхъо­кIы­ныгъэхэр афэхъугъэх.

Ахэр зыфэгъэхьыгъэхэр цIыф зэхахьэхэр, зыныбжь илъэс 65-м шIокIыгъэхэр, шхапIэхэм яIофшIэн изэхэщэн арых.

Гъэтхапэм и 31-м нэс

Илъэс 65-рэ ыкIи ащ нахьыбэ зыныбжьхэу Iоф зышIэхэрэр яунэхэм арысынхэу зэрэщыт уахътэр 2021-рэ илъэсым игъэ­тхэпэ мазэ и 22-м къыщыубла-гъэу гъэтхапэм и 31-м нэс афы­лъагъэкIотагъ.

Мыщ фэгъэхьыгъэ Указым Адыгэ Республикэм и ЛIышъхьэу КъумпIыл Мурат кIэтхэжьыгъ.

Ащ елъытыгъэу, зигугъу къэтшIыгъэ ныбжь зиIэхэм IофшIапIэ язытыхэрэм агурагъэIон фае япсауныгъэ щынэгъончъэным пае унэхэм арысынхэ зэрэфаер, ащ пшъэдэкIыжьэу пылъыр. Медицинэ организацием ахэр кIонхэу ищыкIагъэп, электрон шъуашэкIэ къафызэIуахыщт Iоф зэрамышIэшъущтымкIэ тхылъхэр, а уахътэу зэрэдэсыгъэхэм ыпкIэ къа­ратыщт.

Нэужым

Гъэтхапэм и 31-м ыужи илъэс 65-рэ ыкIи нахьыбэ зыныбжьыхэу Iоф зымышIэхэрэри, уз гъэтIылъыгъэ зиIэхэри яунэхэм ары­сынхэ фае.

Iоф зышIэхэу зигугъу тшIырэ ныбжьым итхэм мэзэ гъэпсэфыгъо аратынэу е, IофшIэнымкIэ хэбзэгъэуцугъэу щыIэхэм атетэу, зэпэчыжьэ шIыкIэкIэ агъэлэжьэнхэу IофшIапIэхэм игъо афалъэ­гъугъ.

Гъэтхапэм и 19-м къыщыублагъэу

Адыгеим и ЛIышъхьэ и Уна­шъокIэ республикэм ишхапIэхэм зэхахьэхэр ащырагъэкIокIыхэ хъу­щтых ахэм азыныкъо мына­хьыбэ ушъагъэ ыкIи Iанэхэм азыфагу метрэрэ ныкъорэ адэлъы зыхъукIэ. Общественнэ гъэшхэным пылъ организациехэм къэшъоным тегъэпсыхьэгъэ чIыпIэу яIэхэр къызэIуахыжьыщтых. Джащ фэдэу кинотеатрэхэм проценти 100-м нэсэу цIыфхэр ачIагъэтIысхьэхэми, общественнэ шхапIэхэм кальянхэр къаштэжьыхэми хъущт.