Адыгеим и НыбжьыкIэ гвардие хэтхэм­рэ шIушIакIохэмрэ еджапIэхэм шхын стыр зэращарагъэшхырэм илъыплъэн хэлажьэх.

Мы Iофыгъом республи­кэм мэхьанэшхо щыраты. Апэрэ-яплIэнэрэ классхэм ащеджэхэу нэбгырэ 24500-мэ АдыгеимкIэ икIыгъэ илъэсым иIоныгъо мазэ и 1-м къыщыублагъэу шхын стыр аIэкIагъахьэ. Мэфи­пшIым телъытэгъэ пчэды­жьы­шхэм хэхьащт шхыныгъо­хэр бжыхьэ-кIымэфэ лъэхъа­нымкIэ зэхагъэуцуагъ ыкIи ащ къадыригъэштагъ Роспотребнадзорым Адыгэ Респуб­ликэмкIэ и ГъэIоры­шIапIэ.

Мы тхьамафэм уплъэ­кIуа­кIохэр я 11-рэ Мыекъопэ гурыт еджапIэм щы­Iагъэх.

«ТишхапIэ шапхъэу щы­Iэ­хэм адештэ, еджапIэм щашхын фэе гъомылапхъэ­хэр менюм хэхьэх. Ар шхы­ныгъо зэмылIэужыгъохэм, пкъышъолымкIэ федэхэм къагъэпсы, Роспотребнадзорым къыгъэшъыпкъэжьыгъэу щыт», — къыIотагъ я 11-рэ Мыекъопэ еджапIэм ишхапIэ къыдэгъэкIынымкIэ ипащэу Дыхъу Розэ.

Классхэм арысыр зыфэдизым ыкIи язэпэ­чы­жьагъэ­кIэ щынэгъончъэным ате­гъэпсыхьагъэу чэзыушхэр агъэпсы. ЧIэхьапIэм зызэрагъэкъэбзэщт пкъы­гъохэр пэIутых, Iанэхэмрэ хьакъу­-шыкъухэмрэ щынэгъончъэнхэм пае ищыкIэгъэ фэIо-фашIэхэр зэрахьэх.

«ЛIэужхэм япсауныгъэ изэтеуцонкIэ шхэныр анахь мэхьанэшхо зиIэхэм ащыщ. Джащ пае яцIыкIугъом къы­щыублагъэу тэрэзэу, шап­хъэхэм адиштэу ар зэхэщэгъэныр апшъэрэ Iофыгъохэм ащыщ. Шхын стырыр кIэлэ­еджакIохэм аIэкIэхьан фае ыкIи ащ идэгъугъи, изэмлIэужыгъуагъи шэпхъэ гъэуцугъэхэм адиштэнэу щыт», — къыхигъэщыгъ Урысые общественнэ организациеу «Единэ Россием и Ныб­жьыкIэ гвардие» и Адыгэ шъолъыр къутамэ ипащэу, Мыекъуапэ идепутатэу Бэр­зэдж Асиет.