ИкIыгъэ 2020-рэ илъэсыр уз мэхъаджэу коронавирусым ыпкъ къикIы­кIэ цIыфхэм ащыгъупшэщтэп.

ГумэкIыгъоу, гузэжъогъоу зыхидзагъэхэр, тхьамыкIагъоу унэгъуабэхэм къафихьыгъэр пстэуми дэгъоу тэшIэ. Пандемиер ошIэ-дэмышIэу къызэ­режьагъэм фэдэу, джы мы къихьэгъэ илъэсым ар зэу зэ­кIэкIуагъ. Ащ ушъхьагъоу фэ­хъугъэр икъоу медицинэм иIофышIэхэми къаIонэу ашIэрэп.

Шъугу къэдгъэкIыжьын коронавирусым псынкIэу зызэриу­шъомбгъурэр, зэрэзэпахырэр ыкIи ар бгъэхъужьыныр зэрэ­хьылъэр. Ары пакIошъ, ащ ыуж цIыфым ипсауныгъэ лъэшэу зэщегъакъо, нэмыкI узхэр къы­регъажьэх ыкIи зыпкъ иуцо­жьыным охътабэ ищыкIагъ. ЗыпэкIэкIыгъэхэм ар дэгъоу къагурэIо.

Мы уз мэхъаджэр къызе­жьакIэм ащ пэуцужьыным зэ­рэдунаеу фэхьазырыгъэп. Ащ къыхэкIыкIэ щыIэныгъабэ зыдихьыгъ. Мыщ пэуцужьырэ вакцинэхэм якъэугупшысын къэралыгъохэм яшIэныгъэлэжьхэр дэлэжьагъэх. Урысыем къыщыдагъэкIыгъэ коронави­русым пэуцужьырэ вакцинэу «Спутник V» зыфиIорэм шIуагъэ къызэритырэр ыкIи щынэгъончъэу зэрэщытым тыди щытегущыIэх. Уз мэхъаджэм тызэрэпэуцужьын амалэу непэ ар тиI.

Коронавирусым пэшIуекIорэ вакцинэм ихэлъхьан епхыгъэ Iофтхьабзэр Адыгеим зэрэщыкIорэр джыри зэ шъугу къэтэгъэкIыжьы. Къалэу Мыекъуапэ мыр зэрэщылъыкIуатэрэр къедгъэIотагъ къэлэ IэзапIэу N 1-м иврач шъхьаIэу ЕмтIылъ Оксанэ.

— Коронавирусыр зэрэщынагъом икъэбар пстэуми зэ­лъа­шIагъэ, — къеIуатэ врач шъхьа­Iэм. — Мы уахътэ ар къызэузыхэрэм япчъагъэ зэхапшIэу къыщыкIагъ. Джащ фэдэу, гъу­нэпкъэ гъэнэфагъэу щыIагъэ­хэри нахь агъэмакIэхэу зэрэфежьагъэхэри зэхэтэхы. Ау ащ къикIырэп мы узыр щымыIэжьэу, тызыфэмысакъыжьыныр. Мы узым ия 3-рэ едзыгъоу Европэм зыкъыщызыIэтыгъэм джы зыщытыухъумэнэу зэрэщытыр къыдгурыIон фае. ТызпэшIуекIон уз щыI, джы ащ тызэребэнын амал щыIэ хъугъэ. Вакцинэм ихэлъхьан нахь цIы­фыбэ къызэредгъэубытыщтым джы тыпылъ. Вакцинэм шIуагъэу къытырэр дгъэунэфыгъэ. АдыгеимкIэ ар нэбгырэ мин 12 фэдизмэ ахалъхьагъ, къалэу Мыекъуапэ пштэмэ — нэбгырэ мини 6. Зыхалъхьагъэхэм япсауныгъэкIэ лъэшэу гумэкIыгъо хидзагъэхэу, къяхьылъэкIыгъэу хъугъэ-шIагъэ агъэунэфыгъэгоп. Арышъ, цIыфхэм ты­къяджэ вакцинациер акIунэу.

Мыщ ыпкIэ хэлъэу щытэп. ШIоигъоныгъэ зиIэ пстэуми афикъун хэлъхьагъу пчъагъэ щыI. Тхьамафэ къэс ар рес­публикэм къыIэкIахьэ. Шъугу къэдгъэкIыжьын, COVID-19-м пэуцужьырэ прививкэр зыщахалъхьэрэ чIыпIи 5-у Мыекъуапэ къыщызэIуахыгъэхэм мафэ къэс Iоф ашIэ. Ахэр зыдэщытхэр:

1. къ. Мыекъуапэ, ур. Комсомольскэр, 159. 2. къ. Мыекъуапэ, Чкаловым иур., 77. 3. къ. Мыекъуапэ, я 7-рэ переулкэр, 16. 4. къ. Мыекъуапэ, Жуковскэм иур., 18. 5. ст. Ханскэр, Верещагиным иур., 111.

Прививкэр язгъэшIы мы­хъущтхэр:

— пэтхъу-Iутхъур къызэузыхэрэр; — илъэс 18 мыхъугъэхэр; — вакцинэм хэлъхэр къызэмыкIухэрэр.

Антителахэр иIэмэ цIыфым ыуплъэкIун ищыкIагъэп. Коронавирусыр къызэузыгъэхэм мэ­зи 6 зытешIэкIэ прививкэр арагъэшIы хъущт.

Вакцинэу «Спутник V» зыфиIорэр мэфэ 21-рэ азыфагоу едзыгъуитIоу ахалъхьэ. А шапхъэм шIокI иIэп. Сыда пIомэ иммунитетыр пытэщтэп.

Iэшъынэ Сусан. Сурэтыр Iэшъынэ Аслъан ты­­рихыгъ.