Зэнэкъокъу зэхащэ
Журналистикэм ылъэныкъокIэ Адыгэ Республикэм и ЛIышъхьэ ишIухьафтын афэзыгъэшъошэрэ комиссием зэхэсыгъо бэмышIэу иIагъ.
Адыгеим и Президент 2008-рэ илъэсым мэлылъфэгъум и 30-м ышIыгъэ унашъоу N 41-р зытетэу «Журналистикэм ылъэныкъокIэ Адыгэ Республикэм и ЛIышъхьэ ишIухьафтын афэгъэшъошэгъэным ехьылIагъ» зыфиIорэм диштэу а зэхэсыгъом унашъо щаштагъ 2021-рэ илъэсым журналистикэм ылъэныкъокIэ республикэм и ЛIышъхьэ ишIухьафтын зыфагъэшъошэщтхэр къызщыхахыщт зэнэкъокъу шъхьаихыгъэ зэрэзэхащэрэмкIэ цIыфхэм макъэ ягъэIугъэнэу.
ЛъэныкъуитIукIэ шIухьафтыныр афагъэшъошэщт: гъэзетхэм (журналхэм) къахаутыгъэхэм апае сомэ мини 100, теле-, радиокъэтынхэм апае сомэ мини 100 аратыщт. Журналистикэм ылъэныкъокIэ Адыгэ Республикэм и ЛIышъхьэ ишIухьафтын афэзыгъэшъошэрэ комиссием шIухьафтын къызэратынэу игъо алъэгъурэ журналист IофшIагъэхэмрэ ахэм акIыгъун фэе документхэмрэ 2021-рэ илъэсым чъэпыогъум и 1-м къыщегъэжьагъэу шэкIогъум и 1-м нэс ыштэщтых, 2021-рэ илъэсым шэкIогъум и 1-м къыщегъэжьагъэу шэкIогъум и 30-м нэс ахэм ахэплъэщт.
ШIухьафтын зыфэгъэшъошагъэмэ хъущт IофшIагъэхэр къызэрагъэлъэгъорэ, ахэр зэраштэрэ шIыкIэм Адыгеим икъэралыгъо хабзэ игъэцэкIэкIо къулыкъухэм яофициальнэ сайтэу http://adygheya.ru зыфиIорэм, республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет иразделэу Адыгэ Республикэм и Президент 2008-рэ илъэсым мэлылъфэгъум и 30-м ышIыгъэ унашъоу N 41-р зытетэу «Журналистикэм ылъэныкъокIэ Адыгэ Республикэм и ЛIышъхьэ ишIухьафтын афэгъэшъошэгъэным ехьылIагъ» зыфиIорэр къызэрыхьагъэм нэIуасэ зыщыфэшъушIын шъулъэкIыщт.
Документхэр зэкIэ комиссием итхьаматэ игуадзэу, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу А. А. Шъхьэлахъом мыщ фэдэ адресымкIэ IэкIэжъугъэхьанэу тышъолъэIу: къ. Мыекъуапэ, ур. Крестьянскэр, 236, я 49-рэ каб., тел.: (8772)52-36-01, факсыр: (8772)52-10-16, электрон адресыр: komnac01@yandex.ru.