Адыгэ Республикэм и Премьер-министрэу Геннадий Митрофа­но­вымрэ Iахьзэхэлъ обществэу «Почта России» икъутамэу «Южный» зыфиIорэм ипащэу Андрей Ершовымрэ Адыгеим и Правительствэ зычIэт унэм тыгъуасэ зэIукIэгъу щызэдыряIагъ. Iофтхьабзэм хэлэжьагъэх АР-м экономикэ хэхъоныгъэмрэ сатыумрэкIэ иминистрэу Шэуджэн Зауррэ «Почта России» зыфиIорэм Адыгэ Рес­публикэмкIэ икъутамэ ипащэу Антонина Полухинамрэ.

Iахьзэхэлъ обществэу «Почта России» ишъолъыр къутамэ 2020-рэ илъэсым Iофэу ышIагъэр зэIукIэгъум щызэфахьысыжьыгъ. Республикэм ипоч­тэхэм ащылажьэхэрэм гъэрекIо письмэ миллиони 5 фэдиз, къэмлан цIыкIу мин 820-рэ, посылкэ мин 400, EMS мин 45-м ехъу къаIэкIэхьагъ, гъэзет, журнал миллиони 3 фэдиз цIыфхэм афахьыгъ.

Республикэм ипочтэхэм хэ­хъоныгъэ ягъэшIыгъэныр зэхэсыгъом анахьэу къыщаIэтыгъэ Iофыгъохэм ащыщ. Адыгеим джыдэдэм почти 134-рэ ит, ахэм ащыщэу 110-р къуаджэхэм адэт.

Джэджэ районымкIэ станицэу Келермесскэм дэсхэм Адыге­им и ЛIышъхьэу КъумпIыл Мурат зыкъызэрыфагъэзэгъэ тхьаусыхэ тхылъым зэхэсыгъом щыхэплъагъэх. Япочтэ зэрэзэфашIы­жьыгъэм псэупIэм дэсхэр зэри­гъэгумэкIырэр а тхыгъэм ит. Келермесскэм дэт почтэр псын­кIэу къызэIухыжьыгъэным епхыгъэ IофыгъомкIэ зэIукIэгъум щызэзэгъыгъэх.

Тэхъутэмыкъое районымкIэ поселкэу Яблоновскэм дэсхэм илъэс къэс зэрахахъорэм ыпкъ къикIкIэ япочтэ зегъэушъомбгъугъэным епхыгъэ Iофыгъом шъхьафэу зэIукIэгъум щыхэп­лъагъэх. Iахьзэхэлъ обществэу «Почта России» зыфиIорэм зэхищэрэ фэIо-фэшIакIэхэу цифрэ амалхэр зыщыгъэфе­дагъэхэм афэдэхэм Адыгеим зызэращырагъэушъомбгъущт шIыкIэми мыщ щытегущыIагъэх.

ЗэIукIэгъум хэлэжьагъэхэм республикэм ихэбзэ къулыкъу­хэмрэ Iахьзэхэлъ обществэу «Почта России» зыфиIорэмрэ язэдэлэжьэныгъэ игъэпытэн мэхьанэшхо зэриIэр хагъэунэфыкIыгъ.

Адыгэ Республикэм и ЛIышъхьэ ипресс-къулыкъу