Зэрэдунаеу зэлъызыштэгъэ коронавирусыр сэри къызнэсынэу хъу­гъэ. Нэбгырэ пэпчъ ащ къыщиухьанэу мэгугъэ, ау непэрэ мафэм ехъулIэу Адыгее закъом нэбгырэ 13970-м ехъумэ мы узыр къа­ха­гъэщыгъ. Cымаджэхэрэм япчъагъэ ­джы нахь макIэ зэрэхъугъэм сегъэгушIо, узыр кIодыжьынышъ, ыпэрэ щыIакIэм тыте­хьажьынэу тыфай.

Сыкъэсымаджэ фэдэу къызысшIошIым, Хьакурынэхьаблэ дэт сымэджэщым сыкIуагъ, лъэтемытэу уцхэм сяшъонэу езгъэжьагъ. Ау, мафэ къэс сиIоф нахь хьылъэ зэрэхъурэр къызызгурэIом, Мыекъуапэ щагъэпсыгъэ госпиталым секIо­лIагъ. Тыгъэгъазэм и 24-м къы­щегъэжьагъэу щылэ мазэм и 11-м нэс ащ сычIэлъыгъ. Тхьабылхэм процент 25-кIэ ахэIагъэу къычIэкIыгъ, ар ащ фэдизэу багъэп, ау къарыунчъэ сишIыгъагъ. ИгъэкIотыгъэу сызауплъэкIум, пкъышъолым егоонэу ригъэжьагъэу къыса­Iуагъ.

Слъэ сыкъытезыгъэуцожьыгъэ врачхэм лъэшэу сызэра­фэразэр къасIо сшIоигъу. Сэ Мыекъопэ къэлэ сымэджэщым я 3-рэ къатым къыщызэIуахыгъэ отделением сычIэлъыгъ. Анахьэу къыхэзгъэщымэ сшIоигъор ащ ипащэу агъэнэфэгъэгъэ Къантемыр Хьалимэт ары. Пчэдыжь къэс врачэу къычIахьэхэрэм анэмыкIэу ежьыри непэ зэ къытхэмыхьэу хъугъэп. Узым гур ыгъэкIодыгъэу ущылъы зы­хъукIэ къызэрэбдэзекIохэрэм мэхьанэшхо иI. ГукIэгъуныгъэ хэлъэу, ищыкIэгъэ IэпыIэгъур ащ тигъэгъотыгъ. Тыгу амы­гъэкIодэу, гугъэ къытатэу ты­чIэлъыгъ. ХэушъхьафыкIыгъэ шъуашэхэр ащыгъхэу, зэмыблэжьыхэу Iоф зышIэгъэ врач­хэм лъэшэу сафэраз. Ахэм ахэтыгъэх студент ныбжьыкIэ­хэри. Мафэ къэс лъыдэкIуаер, пкъыр зэрэплъырэр ашыгъэх. Ахэм ялъытыгъэу къызэрэтэ­Iазэхэрэми зэхъокIыныгъэхэр фэхъущтыгъэх. Зыпкъ сыкъырагъэуцожьыгъ, ащкIэ лъэшэу сафэраз.

А. Хьакъуй. Сурэтым итыр: Къантемыр Хьалимэт.