Урысые Федерацием и Президент и Полномочнэ лIыкIоу ЮФО-м щыIэ Владимир Устиновым видеоселектор шIыкIэм тетэу тыгъуасэ зэрищэгъэ зэхэсыгъор ошIэ-дэмышIэ тхьамыкIа­гъохэр къэмы­гъэхъугъэн­хэмкIэ ыкIи ахэм къыздахьыхэрэр дэгъэзыжьы­гъэнхэмкIэ амалэу зэрахьэхэрэм афэгъэхьыгъагъ.

Хабзэм ифедеральнэ къулыкъухэм ялIыкIохэри, ЮФО-м хэхьэрэ шъолъырхэм япащэхэри ащ хэлэжьагъэх.

Адыгеим ыцIэкIэ республикэм и ЛIышъхьэу КъумпIыл Мурат Iофтхьабзэм хэлэжьагъ. Джащ фэдэу Урысые Федерацием и Президент и Полномочнэ лIыкIоу ЮФО-м щыIэм иаппарат Адыгэ РеспубликэмкIэ ифедеральнэ инспектор шъхьаIэу Сергей Дрокиныр, АР-м и Пре­мьер-министрэу Геннадий Митрофановыр, Адыгеим иминист­рэхэм я Кабинет хэтхэр, шъо­лъырым ихэбзэухъумэкIо къулы­къухэмрэ ошIэ-дэмышIэ IофхэмкIэ и Министерствэрэ ялIыкIохэр зэхэсыгъом хэлэжьагъэх.

Зэхэсыгъор къызэIуихызэ, Владимир Устиновым зэрэхигъэунэфыкIыгъэмкIэ, Урысыем и Президентэу Владимир Путиным къафигъэпытагъ машIом зыкъызэриштэрэмкIэ, псыкъиунымкIэ Iофхэм язытет икъоу зэхафынэу, мыщкIэ гъэцэкIэкIо хабзэм икъулыкъухэм щыкIагъэу яIэхэр дагъэзыжьынэу.

«2020-рэ илъэсым процент 15-кIэ нахьыбэу машIом зы­къи­штагъ. ГъэрекIо мэзхэм гъогогъу 318-рэ машIо къа­кIэ­нагъ. БлэкIыгъэ илъэсхэм ягъэ­пша­гъэмэ, ар процент 31-кIэ на­хьыб. Лъэшэу къагъэгъунэрэ чIыопс чIыпIэ­хэм, заповедник­хэм машIом зыкъимыштэнымкIэ амалхэр икъоу ащызэра­хьэхэрэп», — къыIуагъ Владимир Устиновым.

Ащ зэрэхигъэунэфыкIыгъэмкIэ, чIыопсым икъэухъумэн тегъэпсыхьэгъэ хэбзэгъэуцугъэр зэрагъэцакIэрэм пхъашэу гъунэ лъыфыгъэн, хэукъоныгъэ зышIхэрэм пшъэдэкIыжь ягъэхьыгъэн фае. Специалистхэм зэралъытэрэмкIэ, мыгъэ псыхъохэу Дон, Волгэ, Пшызэ зыкъаIэтын алъэкIыщт, гидротехническэ псэуалъэхэм яIы­гъынкIэ ыкIи ягъэцэкIэжьынкIэ Iофыгъохэр къэуцух. Зэхэсы­гъом зэрэщыхагъэунэфыкIыгъэм­кIэ, зыми фэмыгъэзэгъэ дамбэ 910-рэ ЮФО-м ит.

Зэхэсыгъом къыщыгущыIагъэх Урысыем ошIэ-дэмышIэ IофхэмкIэ ыкIи граждан зыу­хъу­мэжьынымкIэ иминистрэ игуа­дзэу Илья Денисовыр, Урысые Федерацием чIыопс къэкIуапIэхэмкIэ ыкIи экологиемкIэ иминистрэ игуадзэу Сергей Ястребовыр, мэз хъызмэтымкIэ Федеральнэ агентствэм ипащэ игуадзэу Александр Агафоновыр, Росгидрометым ЮФО-мкIэ ыкIи СКФО-мкIэ идепартамент ипащэу Ольга Заболотнаяр, Краснодар краим, Волгоград, Ростов хэкухэм яадминистрациехэм япащэхэр.

Владимир Устиновым зэхэсыгъом хэлэжьагъэхэм пшъэ­рылъ афишIыгъ зытегущыIэгъэ IофыгъохэмкIэ предложениехэр къагъэхьазырынхэу.

Псыкъиуным къыздихьын ылъэкIыщт тхьамыкIагъохэм защыухъумэгъэным пае Адыгеим сомэ миллиони 110-м ехъу зытефэрэ IофшIэнхэр щагъэцэкIагъэх. Псыхъохэу Лабэ, Фарзэ, Псынэф, Шъхьэгуащэ ядамбэхэр агъэцэкIэжьыгъэх, Мыекъопэ районым псыхъоу Джаджэ икъуладжэ щагъэкъэ­бзагъ, зыми имые дамбэ 41-р балансым хэгъэхьэгъэным ыуж итых. Псыхъохэр къиунхэ зэралъэкIыщтым тегъэпсыхьагъэу кIуачIэхэмрэ мылъку гъэ­нэфагъэрэ агъэхьазырыгъ.

Зэхэсыгъом икIэуххэм атетэу республикэм и ЛIышъхьэу Къум­пIыл Мурат хэбзэ къулыкъухэм япащэхэм пшъэрылъ заулэ афи­шIыгъ.

«Къэралыгъомрэ Къыблэ фе­деральнэ шъолъырымрэ япащэхэм пшъэрылъ гъэнэфагъэхэу машIомрэ псыкъиунымрэ япхыгъэ ошIэ-дэмышIэ Iофхэр нахь макIэ шIыгъэнхэм тегъэпсы­хьагъэхэр къытфашIыгъэх. Мы лъэ­ныкъомкIэ шъолъырым Iофыгъуабэ щызэрахьагъ. Ащ емылъытыгъэу мэхьанэ иI къэ­хъун ылъэкIыщтхэр къыдэлъытэгъэнхэм. Псыр къиуным ищынагъо зыщыщыIэ уахътэм ехъу­лIэу гидротехническэ псэолъэ пстэури уплъэкIугъэн фае. Къа­­Iэтыгъэ Iофыгъохэм язэшIо­хын­кIэ амалышIур республикэ программэу «Хэбзэукъоныгъэ­хэмрэ ошIэ-дэмышIэ Iофхэмрэ къэмыгъэхъугъэнхэр» зыфиIо­рэм игъэцэкIэн», — къыкIи­гъэтхъыгъ КъумпIыл Мурат.

АР-м и лIышъхьэ ипресс-къулыкъу