Мы мафэхэм «2021-рэ илъэсым икIэлэегъэджэ анахь дэгъу» зы­фи­Iорэ Урысые зэнэкъокъум имуниципальнэ уцугъоу Мыекъуапэ щы­кIуа­гъэм изэфэхьысыжьхэр мы мафэхэм къэнэфагъэх.

МыекъуапэкIэ анахь кIэлэ­егъэджэ дэгъоу къыхахыгъэр поселкэу Севернэм дэт гурыт еджапIэу N 27-м географиемкIэ икIэлэегъаджэу Лидия Пышненкэр ары.

Iофтхьабзэм изэфэхьысыжь лицееу N 35-м щыкIуагъ. Ащ хэлэжьагъэх Мыекъопэ къэлэ администрацием гъэсэныгъэмкIэ и Комитет ипащэу Ольга Рома­ненкэр, Мыекъуапэ инароднэ депутатхэм я Совет итхьаматэу Джарымэкъо Азмэт, «2020-рэ илъэсым икIэлэегъэджэ анахь дэгъу» зыфиIорэм хэлэжьагъэу, республикэм текIоныгъэ къыщы­дэзыхыгъэ, Урысые зэнэ­къо­къум ифинал ихьэгъэ Сер­гей Левчен­кэр. Ахэр кIэлэегъаджэу зэнэ­къокъум хэлэжьагъэхэм афэ­гу­шIуагъэх, дипломхэр ыкIи шIу­хьафтынхэр афагъэшъоша­гъэх.

Шъугу къэдгъэкIыжьын , Урысые зэнэкъокъум имуниципальнэ уцугъо мэзаем и 17-м къыщегъэжьагъэу и 26-м нэс Мые­къуапэ щыкIуагъ. ЗэкIэмкIи кIэ­лэегъэджэ нэбгыритф ащ хэ­лэжьагъ. «Методическая мастерская», «Классный час», «Мастер-класс» ыкIи «Урок» зы­фиIохэрэмкIэ кIэлэегъаджэ­хэм заушэтыгъ. ЯтIонэрэ уцугъом гъэсэныгъэм епхыгъэ уп­чIэхэр зэхафыгъэх.

Анахь дэгъоу зыкъэзыгъэлъэ­гъогъэ Лидия Пышненкэм джы республикэ зэнэкъокъум зыфегъэхьазыры. Джащ фэдэу, ха­гъэунэфыкIырэ чIыпIэ къыдэзы­хыгъэ Цундышкэ Лариси рес­публикэ зэнэкъокъум хэлэ­жьэщт. Гурыт еджапIэу N 15-м хьисапымкIэ кIэлэегъаджэу ащ Iоф ешIэ.

ДЕЛЭКЪО Анет. Сурэтыр Мыекъопэ къэлэ ад­­министрацием къытIэкIигъэ­хьагъ.