УФ-м и Президентэу Владимир Путиным бюдже­тым епхыгъэу Iоф зышIэхэрэм ялэжьапкIэхэм, къэ­­гъэлъэгъонэу зыкIэхьанхэ фаехэм ахэр зэрэди­­­штэхэрэм афэгъэхьыгъэ къэбарыр къэкIо­рэ мэлылъфэгъу мазэм и 20-м шIомыкIэу къагъэ­хьазырынэу унашъо къышIыгъ. Правительствэм и Тхьа­матэу Михаил Ми­шустинымрэ шъолъырхэм апшъэрэ пэщэ IэнатIэр ащы­зыIыгъыхэмрэ ар зипшъэрылъэу ыгъэнэфагъэхэр.

Анализыр зашIыкIэ, зэкIэ IофшIапIэм Iутхэр, ахэм ежьхэм яIофшIэн гъэнэфагъэ нэмыкIэу дагъэцакIэрэ щыIэмэ, дэзыгъэцакIэхэрэм шапхъэу афагъэнэфагъэхэр, нэбгырэ пэпчъ IофшIэгъэ илъэсэу иIэр къыдалъытэнхэ фае. Джащ фэдэу къулыкъум ипащэ, ащ игуадзэ, бухгалтер шъхьаIэм ыкIи нэмыкIэу Iутхэм ялэжьапкIэ шъхьаф-шъхьафэу, гурытымкIэ лъытагъэу, къагъэлъэгъоныр шIокI зимыIэ Iофэу щыт.

Шъугу къэдгъэкIыжьын, УФ-м и Президент ижъоныгъокIэ унашъохэм атетэу, 2012-рэ илъэсым къыщыу­благъэу 2018-м нэс, бюджетым епхыгъэу Iоф зышIэхэрэм къагъахъэрэр лэжьэпкIэ анахь макIэу шъолъырым щыгъэнэфагъэм кIагъэхьагъ, нэужыми ащ тетэу хахъозэ лъыкIотэн фаеу щыт. Апшъэрэ еджапIэхэм якIэлэегъа­джэхэм, врачхэм ыкIи научнэ Iофы­шIэхэм къагъахъэрэр лэжьэпкIэ анахь макIэм фэдитIум къыщымыкIэнэу унашъом къыщеIо.

Илъэсэу тызыхэтым имэзае и 10-м Владимир Путиным зэхэсыгъоу иIагъэм ушэтыпIэ институтэу Сыбыр лъэ­ныкъом щыIэхэм ащыщ инаучнэ IофышIэ зыкъыфигъази, илэжьапкIэ зэрэмакIэм пае къызетхьаусыхылIэм ыуж, бюджетым епхыгъэхэм къагъахъэрэм ынаIэ тыридзагъ. Ащ ыуж УФ-м и Правительствэ и Тхьаматэу Михаил Мишустиным бюджетым епхыгъэ къулыкъухэм яIофышIэхэм ялэжьапкIэ зыфэдизым фэгъэхьыгъэ доклад къагъэхьазырынэу УФ-м IофшIэнымкIэ ыкIи цIыфхэр социальнэу къэухъумэгъэнхэмкIэ и Министерствэ пшъэрылъ фишIыгъ.