Зыныбжь имыкъугъэхэм хэбзэукъоныгъэхэр зэрамыхьанхэм фэшI анахьэу анаIэ зытырагъэтын фэе лъэныкъохэм щытегущыIагъэх мыщ фэгъэзэгъэ республикэ комиссием зичэзыу зэхэсыгъоу тыгъуасэ иIа­гъэм. Ащ тхьамэтагъор щызэрихьагъ АР-м ивице-премьерэу Наталья Широковам.

Адыгеим хэгъэгу кIоцI Iоф­хэмкIэ и Министерствэ къызэритырэмкIэ, зыныбжь имыкъугъэхэм хэбзэукъоныгъэхэр зэрамыхьанхэм, наркотикхэр амыгъэфедэнхэм, ащ дакIоу ахэм яфитыныгъэхэр къэухъу­мэгъэнхэм фытегъэпсыхьэгъэ оперативнэ-пэшIорыгъэшъ Iоф­тхьабзэхэр республикэм щы­рагъэкIокIых.

Джащ фэдэу шъолъыр къэ­ралыгъо программэу «Гъэсэныгъэм хэхъоныгъэ ышIыныр» зы­фиIорэм къыдыхэлъытагъэу АР-м гъэсэныгъэмрэ шIэ­ны­гъэмрэкIэ и Министерствэ хэ­бзэухъумэкIо ыкIи муни-ципальнэ къулыкъухэр игъусэхэу мы IофшIэныр чIыпIэхэм ащызэхащэ.

Профилактическэ учетым хэт зыныбжь имыкъугъэхэр зэ­ре­джэхэрэр, кружокхэм ыкIи сек­циехэм зэрэкIохэрэр ауплъэкIух. 2020-рэ илъэсым иятIонэрэ илъэсныкъо ащ фэдэ кIэлэеджэкIо 393-рэ республикэм щатхыгъ.

ГумэкIыгъоу, щыкIагъэу къэу­цухэрэр игъом дэгъэзыжьы­гъэнхэм фэшI ведомствэхэм яIо зэхэлъэу Iоф зэдашIэн зэ­рэфаер Наталья Широковам хигъэунэфыкIыгъ.

Iэтахъохэм япсауныгъэ агъэ­пытэным фытегъэпсыхьэгъэ Iофтхьабзэу зэхащэхэрэм къатегущыIагъ Адыгеим псауны­гъэр къэухъумэгъэнымкIэ иминистрэ иапэрэ гуадзэу Максим Коробкэр. Илъэс 15 — 17 зыныбжьхэу пэшIорыгъэшъ медицинэ уплъэкIунхэм къахиубытэхэрэм япчъагъэ 2019-рэ илъэсым процент 63-рэ хъущтыгъэмэ, блэкIыгъэ илъэсым ар процент 72-м кIэхьагъ.

Зэхэсыгъом хэлэжьагъэхэр нэмыкI Iофыгъохэми ахэплъагъэх, анахьэу анаIэ зытыра­гъэтын фэе лъэныкъохэр агъэ­нэфагъэх.