Узыр пэшIорыгъэшъэу къыхэгъэщыгъэным фэшI
Илъэс къэс зэхащэрэ Iофтхьабзэу «Сердце для жизни» зыфиIорэр мы мафэхэм Адыгеим щэкIо.
Республикэм щыпсэухэрэр япсауныгъэ нахь лъыплъэнхэр, гу-лъынтфэ узхэр пэшIорыгъэшъэу къыхэгъэщыгъэнхэр ары пшъэрылъыр. Лъэпкъ проектэу «Псауныгъ» зыфиIорэм илъэныкъо шъхьаIэхэм ащыщ гу-лъынтфэ узхэм апэшIуекIогъэныр.
Мазэм къыкIоцI медицинэ профилактикэмкIэ Гупчэм иIофышIэхэм студент-волонтерхэр ягъусэхэу предприятиехэр къакIухьэхэзэ уплъэкIунхэр ашIых. ШIоигъоныгъэ зиIэхэм гур, лъыдэкIуаер ыкIи нэмыкIхэр ауплъэкIунхэ алъэкIыщт. Iофтхьабзэм къыдыхэлъытагъэу предприятиехэм Iоф ащызышIэхэрэр зыфэсакъыжьынхэм, лъыдэкIуаем лъыплъэнхэм анаIэ тырадзэным къыфащагъэх.
Мы мафэхэм ПенсиехэмкIэ фондым иIофышIэхэм адэжь щыIагъэх. Нэбгырэ 47-мэ япсауныгъэ изытет ауплъэкIугъ. Ахэм ащыщэу 17-мэ лъыдэкIуае яIэу агъэунэфыгъ.
— Спортым зэрэпымылъхэр, макIэу зэрэзекIохэрэр, тэрэзэу зэрэмышхэхэрэр ары анахьэу псауныгъэм изытет зэIызыгъахьэрэр. Арышъ, пэшIорыгъэшъэу узхэр къыхэгъэщыгъэнхэр, игъом медицинэм иучреждениехэм якIолIэнхэр ары пшъэрылъ шъхьаIэу щытыр, — къыIуагъ медицинэ профилактикэмкIэ Гупчэм иврач шъхьаIэ.
Iофтхьабзэм къыдыхэлъытагъэу республикэм ит организациехэр гъэтхэпэ мазэм къакIухьэх. Нахь игъэкIотыгъэу ауплъэкIун ыкIи зэIэзэнхэ фаеу къахэкIырэр макIэп, ахэм япсауныгъэ къаухъумэным фэшI ашIэнэу щытхэр къафаIотагъэх. IэшIу-IушIухэр къызыщыдагъэкIырэ фабрикэу «Сластенам» иIофышIэхэм адэжьи мы мафэхэм щыIагъэх.
ДЕЛЭКЪО Анет.