1992-рэ илъэсым игъэтхэпэ мазэ и 17-м Советскэ Социалистическэ Адыгэ Рес­пуб­­ликэм и Апшъэрэ Совет иапэрэ зэхэсы­гъо къызэIуахыгъагъ. Ары мы мафэр Адыге­им ипарламентаризмэ и Мафэу хагъэу­нэфы­кIыным лъапсэу фэхъугъэр.

1990-рэ илъэсхэу, къэралыгъом иобщественнэ-политическэ щыIакIэ, экономикэм къиныгъохэр мымакIэу къызщы­зэпичыхэрэм Адыгеим и Парламент игъэпсын тефагъ. Апэ- дэдэ ащ Адыгеим и Апшъэрэ Совет зэреджэгъагъэхэр. 1991-рэ илъэсым итыгъэгъазэ уцогъуиплIэу ащ идепутатхэр ха­дзыгъагъэх. Депутат нэбгыри 100-у ащ хэхьэгъагъэм щыщэу 45-р адыгагъэх, 49-р урысыгъэх, нэбгырихыр нэмыкI лъэпкъхэм ащыщыгъэх.

Нэужым, 1993-рэ илъэсым, Адыгеим республикэ статус иIэ зэхъум, мы органым Хэбзэ­гъэуцу ЗэIукIэ ыцIэнэу ашIы­жьыгъ. 1996-рэ илъэсым ищылэ мазэ къыщегъэжьагъэу Адыгэ Республикэм и Къэралыгъо Совет — Хасэу щыт. 2000-рэ илъэсым ар палатитIоу агощыгъагъ, ау, илъэсипшI зытешIэ ужым, зы палатэ ашIыжьыгъ.

Непэ АР-м и Къэралыгъо Совет — Хасэм депутат 50 хэт, лъэныкъо зэфэшъхьафхэм афэгъэзэгъэ комитетхэмкIэ зэтеутыгъ, ахэр 7 мэхъух, статусымкIэ, регламентымкIэ ыкIи де­путат этикэмкIэ комиссие иI.

Республикэм ихэбзэ гъэцэ­кIэкIо къулыкъухэм Iоф адашIэзэ парламентариехэм хэ­бзэгъэуцун Iофыр лъагъэкIуатэ. Гъэсэныгъэм, псауныгъэм икъэу­хъумэн, цIыфхэр социальнэу къэухъумэгъэнхэм, нэмыкIыбэхэм алъэныкъокIэ законопроектхэм Iоф адашIэ, законхэр аштэх, бюджет зэфыщытыкIэ­хэм, хэбзэIахьхэм афэгъэхьыгъэхэм ягъэкIэжьын фытегъэ­псыхьэгъэ хэбзэгъэуцугъэхэм япроектхэми адэлажьэх.