Гъэтэрэзыжьынхэм атегущыIэщтых
IофшIэн яIэным ехьылIэгъэ законым гъэтэрэзыжьынхэу фашIыщтхэм Урысые Федерацием ишъолъыр пстэуми ащатегущыIэщтых.
«Партиехэм ядепутатхэри, профсоюзхэм ялIыкIохэри, экспертхэри ахэм ахэлэжьэщтых.
Законопроектыр ятIонэрэ хэплъэгъум фагъэхьазыр зыхъукIэ, предложениеу къахьыгъэхэр къыдалъытэщтых. ЦIыф куп заулэмэ IэпыIэгъу тедзэ ягъэгъотыгъэным фэгъэхьыгъэ предложениехэр шъолъырхэм къащахьынхэу тэгугъэ. Апэрэ чэзыоу гущыIэр зыфэгъэхьы-гъэр специалист ныбжьыкIэхэм, сэкъатыныгъэ зиIэхэм, пенсием зикIогъу къэсхэрэм яфедэхэр къэухъумэгъэнхэр ары. Социальнэу дэеу ухъумэгъэ цIыфхэм IофшIэн къязытыхэрэм фэгъэкIотэныгъэхэр афэшIыгъэн зэрэфаем фэгъэхьыгъэ гъэтэрэзыжьынхэм шъолъырхэм къащадырагъэштэнэу къысщэхъу. Урысые Федерацием и Президентэу Владимир Путиным джащ фэдэ пшъэрылъ Правительствэм фишIыгъ», — къыIуагъ Андрей Исаевым.
Шъугу къэтэгъэкIыжьы цIыфхэм IофшIэн яIэным фэгъэхьыгъэ законым фашIыхэ ашIоигъо гъэтэрэзыжьынхэр партиеу «Единэ Россием» мэзаем и 18-м Къэралыгъо Думэм зэрэрихьылIагъэхэр. Партием и Тхьаматэу Дмитрий Медведевым законым зэхъокIыныгъэу фашIыщтхэр къагъэхьазырынэу пшъэрылъ афишIыгъагъ.
ЦIыфхэм IофшIэн къафэзыгъотырэ шъолъыр гупчэхэм яполномочиехэр федеральнэ гупчэхэм афэгъэзэжьыгъэн фаеу документым къыделъытэ. Джащыгъум зэрэхэгъэгоу системэ зыкI щызэхащэн алъэкIыщт, апэрэ чэзыоу IофшIапIэхэр зэратыщтхэр Урысыем исхэр ары. Законыр заштэкIэ, IофшIэн яIэным епхыгъэ Iофыгъохэм азыныкъо нахьыбэр Iудзыгъэ шIыкIэм тетэу зэшIуахын алъэкIыщт.
«Единэ Россием» ифракциеу Къэралыгъо Думэм щыIэм ипащэу Сергей Неверовыр Урысые Федерацием и Президентэу Владимир Путиным зыIокIэм, фракциер анахьэу зыдэлэжьэщтхэм IофшIэн яIэным ехьылIэгъэ законым фашIыщт гъэтэрэзыжьынхэри зэращыщхэр къыIуагъ. Къэралыгъом ипащэ партием хэтхэм пшъэрылъ афишIыгъ Правительствэм игъусэхэу цIыфхэм IофшIэн къафэзыгъотырэ гупчэхэмкIэ шапхъэхэр гъэнэфэгъэнхэм япхыгъэ Iофыгъом дэлэжьэнхэу.