Гъэтхапэм и 12-м Адыгэ къэралыгъо университетым я 6-рэ Кавказ хьисап олимпиадэр къыщызэIуахыгъ. Мы илъэсым ащ кIэлэеджэкIуи 170-рэ фэдиз хэлажьэ. Урысыем, Болгарием, Казахстан, Тыркуем, Белоруссием, Армением, Узбекистан, Таджикистан ыкIи нэмыкIхэм къарыкIыгъэхэр ащ къекIолIагъэх.

АР-м гъэсэныгъэмрэ шIэныгъэмрэкIэ и Министерствэрэ Адыгэ къэралыгъо университетым и Кавказ хьисап гупчэрэ Iофтхьабзэм кIэщакIо фэ­хъу-гъэх. Олимпиадэм изэхэщэнкIэ АР-м иминистрэхэм я Кабинет, компаниеу «ITV Axxon Soft» зыфиIорэр IэпыIэгъу къа­фэ­хъугъэх.

Олимпиадэм Урысыем и Къыблэ ишъолъыр 15-мэ къарыкIыгъэ кIэлэеджакIохэр хэлажьэх. Джащ фэдэу Саратов хэкум, Абхъазым, Азербайджан, Армением, Иран, Тыркуем ыкIи нэмыкIхэм къарыкIыгъэх. Зэ­кIэмкIи Урысыем ичIыпIэ зэфэшъхьафхэм къарыкIыгъэ нэбгырэ 88-рэ, IэкIыбым щыщ 78-рэ хэлэжьагъэх. Урысыем щыщхэр Мыекъуапэ къэкIуагъэх, IэкIыб къэралыгъохэм ялIыкIохэм пэIудзыгъэ шIыкIэм тетэу яшIэныгъэхэр къагъэлъагъох.

Кавказ хьисап олимпиадэр апэрэу 2015-рэ илъэсыр ары зызэхащэгъагъэр. Iофтхьабзэр къызэIуихыгъ АР-м гъэсэны­гъэмрэ шIэныгъэмрэкIэ иминистрэу КIэрэщэ Анзаур. Олимпиадэм шIогъэ ин зэриIэр, хэлажьэхэрэм япчъагъэ илъэс къэс нахьыбэ зэрэхъурэр ащ къыхигъэщыгъ.

Адыгэ къэралыгъо университетым иректорэу Мамый Даутэ къызэриIуагъэмкIэ, олимпиадэм къэралыгъо зэфэшъхьафхэр зэрепхых. Мы илъэсым Латинскэ Америкэр, Европэм ихэгъэ­гухэр, Гурыт Азиер, нэмыкIхэри къыхэлажьэх. ХьисапымкIэ сэ­наущыгъэ ин зыхэлъхэр Адыгеим щаугъоинхэр, къэралыгъо­хэм азыфагу зэныбджэгъуныгъэ илъыныр ары пшъэрылъ шъхьа­Iэр.

ИлъэситфыкIэ узэкIэIэбэжь­мэ олимпиадэм «талисман» иIэ хъугъэ — шIэныгъэм епхыгъэ хьисап чъыг агъэпсыгъагъ. Iоф­тхьабзэм ар къыщыхагъэнагъ. Мы илъэсым ар зыфагъэшъошагъэр Темыр Осетием къикIыгъэу, олимпиадэм анахь ныбжьыкIэу къекIолIэгъэ Дзерассе Бежаевамрэ осэшIхэм анахь ныбжьыкIэу ахэт Даниле Деминымрэ. Москва ифизикэ-техническэ институт ар истудент, 2020-рэ илъэсым Дунэе хьисап олимпиадэм дышъэ медаль къыщихьыгъ.

КIэлэеджакIохэр зэрэзэнэ­къокъущтхэм дакIоу респуб­ликэм ичIыпIэ дахэхэр арагъэ­лъэгъущтых, тарихъыр, шэн-хабзэхэр къафаIотэщтых, хьисапымкIэ лекцие къафеджэщтых, джащ фэдэу культурнэ-спорт программэ гъэшIэгъон афызэхагъэуцуагъ.

Гъэтхапэм и 13-м ыкIи и 14-м олимпиадэм иапэрэ, иятIонэрэ уцугъохэр зэхащагъэх. Iофтхьабзэр непэ аухыщт.

ДЕЛЭКЪО Анет.