Мыекъопэ районым ипсэупIэу Каменномостскэм физкультурнэ-спорт Унэшхо мы илъэсым щагъэпсын ямурад.

Каменномостскэ къоджэ псэупIэм иадминистрацие икъулыкъушIэхэм къызэраIуагъэу, къати 2 хъурэ Унэшхом квадрат метрэ 675-рэ зэлъиубытыщт.

Спорт зэнэкъокъухэр, псауныгъэм игъэпытэнкIэ зэхахьэхэр Унэшхом щыкIощтых, егъэджэн зэIукIэгъу­хэри щызэхащэщтых. Спорт залышхом футбол цIыкIу, баскетбол, волейбол щешIэнхэ алъэкIыщт. Зызыщафэпэщтхэр, яфэIо-фашIэхэр зыщагъэцэкIэщтхэр унэшхом хэтыщтых.

ЯтIонэрэ къатым гимнастикэм, аэробикэм, псауныгъэм игъэпытэн фэгъэхьыгъэ спорт псэуалъэхэр къыщызэIуахыщтых.

КIэлэеджакIохэм ямызакъоу, Каменномостскэм щыпсэухэрэм илъэсым исыд фэдэрэ уахътэ къыхахыщтми, спортымкIэ, физкультурэмкIэ яIэпэIэсэныгъэ щыхагъэхъон, япсауныгъэ щагъэпытэн алъэкIыщт.

Къоджэ псэупIэхэм хэхъоныгъэ ашIыным фэгъэхьыгъэ къэралыгъо Программэр щыIэныгъэм щыпхыращызэ, спорт Унэшхом игъэпсын фежьагъэх. Мыекъо­пэ районым иадминистрацие, Адыгэ Республикэм и Правительствэ Федеральнэ Iофтхьабзэм чанэу хэлажьэх. Аужырэ илъэсхэм къалэу Мыекъуа­пэ, Кощхьэблэ, Теуцожь районхэм, фэшъхьафхэм спорт псэуалъэхэр къа­щызэIуахыгъэх. Зэнэкъокъухэр зэращызэхащэрэм дакIоу, псауныгъэр агъэпытэнымкIэ цIыфхэм амалышIухэр яIэ хъугъэх.

«ПкIашъэм» зыщагъасэ

— 2018-рэ илъэсым спорт Унэшхоу «ПкIашъэр» Пэнэжьыкъуае къыщызэIуа­хыгъ, — къытиIуагъ Теуцожь районым иадминистрацие физкультурэмкIэ ыкIи спортымкIэ игъэIорышIапIэ ипащэу Хьабэхъу Адамэ. — СамбэмкIэ щэбанэх. Волейбол, баскетбол щешIэх, псауны­гъэр щагъэпытэ.

ЯIэпэIэсэныгъэ хагъэхъоным фэшI спорт псэуалъэ­хэр агъэфедэх. КIуачIэр апсыхьэ, сэнаущыгъэу ахэлъыр къызэIуахы.

«Ошъутенэр» ягупч

БаскетболымкIэ, волейболымкIэ, гандболымкIэ Урысыем изэIукIэгъухэр «Ошъутенэм» щэкIох.

Спорт Унэшхом ипащэ ипшъэрылъхэр зыгъэцэкIэрэ Къулэ Руслъан къызэрэтиIуагъэу, псы спортым пыщагъэхэм, гимнастикэм пылъхэм, фэшъхьафхэм «Ошъутенэр» якIуапI. «Мыл Арена» зыфиIорэм хоккей щешIэх, лъэрычъэхэм атетхэу мылым къыщэшъох, спорт зэнэкъокъухэм ахэлажьэх.

Нэбгырэ 300-м нахьыбэмэ физкультурэр, спортыр агъэныбджэгъу. ХоккеимкIэ зэIукIэгъухэр гъэшIэгъонэу кIуагъэх.

ЕмтIылъ Нурбый.