Хэгъэгум футболымкIэ иапшъэрэ куп хэт клубхэм я 22-рэ ешIэгъухэр гъэтхапэм и 12 — 14-м яIагъэх. ЗэIукIэгъухэм якIэуххэр зэдгъапшэхэзэ, анахь лъэшхэр къахэтэгъэщых.

ЕшIэгъухэр

«Химки» — «Ростов» — 1:0, «Урал» — «Ротор» — 1:0, «Арсенал» — ЦСКА — 2:1, «Зенит» — «Ахмат» — 4:0, «Динамо» — «Спартак» — 1:2, «Уфа» — «Рубин» — 0:3, «Тамбов» — «Краснодар» — 0:4, «Локомотив» — «Шъачэ» — 3:1.

Адыгэхэм яижъырэ къалэу Шъачэ иешIакIохэм гуетыныгъэ ахэлъыгъ. Пчъагъэр 0:2-у ешIэгъур ашIуахьызэ, Юсуповым я 58-рэ такъикъым «Локомотив» икъэлапчъэ Iэгуаор дидзагъ – 1:2. Я 88-рэ такъикъым Урысыем ихэшыпыкIыгъэ командэ хэтэу, нахьыпэкIэ «Краснодар» щешIэщтыгъэ Федор Смоловым «Шъа­чэ» икъэлапчъэ Iэгуаор дахэу къыдидзагъ, текIоныгъэр «Локомотив» 3:1-у ыхьыгъ.

«Краснодар» «Тамбов» зыIо­кIэм, Кабеллэ тазыркIэ я 27-рэ такъикъым, Газинскэм я 68-рэ, Олссон я 70-рэ, Ионовым пенальтикIэ я 88-рэ такъикъхэм хъа­гъэм Iэгуаор дадзагъ.

Я 21-рэ ешIэгъухэм «Краснодар» «Спартак» 1:6-у къызэрэтекIуагъэр къыхэдгъэщмэ, гъунэгъу краим икомандэ лъэкIэу иIэр икъоу зэримыгъэфедэрэр къэ­лъагъо.

«Рубин» иешIакIохэу Макаровым, Кварацхелия, Самошниковым я 30, 42-рэ, 74-рэ такъи­къ­хэм «Уфа» икъэлапчъэ Iэгуаор дадзагъ. «Рубин» апэ ит командэхэм пытэу ахэуцон имурад. Тренер шъхьаIэу Леонид Слуцкэм зэрилъытэрэмкIэ, «Рубин» ешIэкIо дэгъухэр хэтых, Урысыем икомандэ анахь лъэшхэм ащыщ.

Кварацхелия иешIакIэ футболым ишэпхъэ лъагэхэм адештэ, Европэм икомандэхэр къылъэплъэх. Макаровым аужырэ ешIэгъухэм къэлапчъэм Iэгуаор дидзэзэ IэпэIэсэныгъэ ин къащегъэлъагъо. Мэшэлахь.

«Динамэр» «Спартак» зыIо­кIэм, зэнэкъокъур зыхьыщтыр къэшIэгъошIугъэп. «Спартак» иухъумакIоу Масловым ымы­шIахэу икъэлапчъэ Iэгуаор ди­дзагъ — Iэгуаор ылъакъо къытефи, хъагъэм щычэрэгъугъ.

Такъикъ 12 тешIагъэу Мозес ешIакIохэм къахэщыгъ. Соболевыр ыпэкIэ илъи, ухъумэкIуитIумэ ябэнызэ азыфагу къыдэкIи, Мозес Iэгуаор ритыгъ, ыужырэр псынкIэу къэлапчъэм дауи, хъагъэм Iэгуаор дидзагъ. Соболевым шIушIагъэу фэтлъэгъурэр ухъумакIохэм пхъашэу зэрябэныгъэр, ешIапIэм зыщытыримыгъафэу хэкIыпIэм зэрэлъыхъугъэр ары.

Я 63-рэ такъикъым Соболевым пенальтикIэ пчъагъэм хигъэ­хъуагъ. «Спартак» медальхэм афэбанэ.

ЦСКА-р къызэкIэкIуагъ. Пантелеевымрэ Ломовицкэмрэ пчъа­гъэр 2:0-м нагъэсыгъ. «Арсенал» текIоныгъэр ыхьыгъ. Тикнизян я 90-рэ такъикъым «Арсенал» икъэлапчъэ Iэгуаор дидзагъ, ау ыгъэгушIуагъэр макIэ. Гужъуа­гъэу гъэхъагъэ ышIыгъэу тэлъытэ.

«Зенит» 4:0-у «Ахмат» те­кIуагъ. Я 51-рэ, 65-рэм пенальтикIэ, 74-рэ, 80-рэ такъикъхэм Караваевым, Азмун, Дзюбэ, Мостовоим «Ахмат» икъэлапчъэ Iэгуа­ор дадзагъ. Караваевым Iэгуаор чэрэгъузэ, хъагъэу зыпэчы­жьэм зыдедзэм, ешIэгъум къэгъэзапIэ фишIыгъ. «Ахмат» къэлапчъэм Iэгуаор дидзэныр къехьылъэкIы хъугъэ, ауж къинэхэрэм ахэфэнымкIэ щынагъо щыI. «Зенит» дышъэм нэмыкI медаль фэбэнэнэу фаеп.

«Урал» 1:0-у «Ротор» текIуагъ. Викфалви хъагъэм Iэгуаор ди­дзагъ. «Химки» 1:0-у «Ростов» къышIуихьыгъ, Мырзэ Резыуан пенальтикIэ я 48-рэ такъикъым къэлапчъэм Iэгуаор дидзагъ. «Ростов» иешIакIоу Алий Соу «Химки» икъэлапчъэ Iэгуаор дидзагъ, ау судьяу Лапочкиныр хэукъуи, пчъагъэм зэхъокIыныгъэ фишIыгъэп, ВАР-р упчIэжьэгъу ышIынэуи ыгу къыгъэкIыгъэп.

ЧIыпIэхэр

1. «Зенит» — 45 2. «Спартак» — 41 3. ЦСКА — 40 4. «Локомотив» — 37 5. «Шъачэ» — 37 6. «Рубин» — 37 7. «Динамо» — 36 8. «Краснодар» — 34 9. «Ростов» — 34 10. «Химки» — 32 11. «Ахмат» — 26 12. «Урал» — 26 13. «Ротор» — 18 14. «Арсенал» — 17 15. «Уфа» — 14 16. «Тамбов» — 13.

Я 23-рэ зэIукIэгъухэр

17.03 «Ротор» — «Ростов» «Ахмат» — «Арсенал» ЦСКА – «Зенит» 18.03 «Уфа» — «Локомотив» «Спартак» — «Урал» «Краснодар» — «Динамо» 19.03 «Шъачэ» — «Тамбов» «Рубин» — «Химки»