Псауныгъэр къэухъумэгъэным исистемэ хэхъоныгъэ ышIыным, лъэпкъ проектхэм къадыхэлъытэгъэ Iофтхьабзэхэм ягъэцэкIэн, вакци­наци­ем, нэмыкI Iофыгъохэм зыщатегущыIэгъэхэ зэхэсыгъо мы мафэ­хэм щыIагъ. Адыгэ Республикэм и ЛIышъхьэу КъумпIыл Мурат ипшъэ­рылъкIэ ар зэрищагъ вице-премьерэу Наталья Широковам.

Iофтхьабзэм хэлэжьагъэх Адыгеим и Къэралыгъо Совет — Хасэм и Тхьаматэу Владимир Нарожнэр, АР-м псауныгъэр къэухъумэгъэнымкIэ иминистрэу Мэрэтыкъо Рустем, Адыгеим шIокI зимыIэ медицинэ страхованиемкIэ и Фонд ипащэу Людмила Ялинар, медицинэ IофышIэхэм респуб­ликэмкIэ япрофсоюз органи­за­цие итхьаматэу Любовь Уса­чевар.

Наталья Широковам зэхэсыгъом пэублэ псалъэ къыщишIызэ Iофыгъоу зытегущыIэхэрэм епхыгъэу блэкIыгъэ илъэсымкIэ зэфэхьысыжьхэр къышIыгъэх, 2021-рэ илъэсым анахьэу анаIэ зытырагъэтын фэе лъэныкъохэр къыгъэнэфагъэх. Панде­мием ыпкъ къикIыкIэ псауныгъэр къэу­­хъумэгъэным исистемэ гу­мэкIыгъуабэ зэряолIагъэр ащ къыхигъэщыгъ.

— Урысыем и Президентэу Владимир Путиным къызэри­Iуагъэу, «лъэпкъ пшъэрылъхэр зэшIохыгъэнхэм фэшI къэра­лыгъом псауныгъэр къэухъумэгъэнымкIэ исистемэ зэрифэ­шъуашэу Iоф ышIэн зэрилъэ­кIыщтыр зэкIэми тлъэгъугъэ» медицинэм иIофышIэхэм къиныгъуабэ зэпачыгъ. Пандемиер къызежьагъэм щыублагъэу медик 1916-мэ ковидыр къяузыгъ. ГухэкI нахь мышIэми, нэбгырэ 15-мэ ядунай ахъо­жьыгъ. Непи мы узым ахэр ебэных, — къыIуагъ Наталья Широковам.

ПшъэдэкIыжьышхо зыхьырэ, цIыфхэм япсауныгъэ ыкIи ящы­Iэныгъэ къэзгъэнэжьырэ медикхэм зэрафэразэхэр хагъэу­нэфыкIыгъ. Вице-премьерым къызэриIуагъэмкIэ, непэрэ ма­фэм ехъулIэу медицинэм иучреждениехэм ящыкIагъэр зэкIэ аIэкIэлъ. БлэкIыгъэ илъэ­сым коронавирусым пэшIуе­кIогъэным республикэм сомэ мил­лиард 1,1-рэ щыпэIуагъэ­хьагъ. Медицинэ организациехэр ыпэкIэ Iоф зэрашIэщтыгъэ шIыкIэм непэ техьажьых.

— Мэхьанэшхо зиIэ пшъэ­рылъхэм ащыщ вакцинациер. Мыщ шIуагъэу пылъыр ыкIи ар зямыгъэшIыкIэ къыкIэлъыкIон ылъэкIыщтыр цIыфхэм агуры­д­гъэIон фае. Вакцинэр зызщы­хябгъэлъхьан плъэкIыщт чIы­пIэхэр республикэм къыщызэ­Iуахыгъэх, нэбгырэ мин 11-м ехъумэ ар акIугъ. Вакцинэм тыщыкIэрэп, ищыкIагъэ хъумэ къытфатIупщырэм хагъэхъощт, — къыхигъэщыгъ АР-м и Премьер-министрэ игуадзэ.

Непэ республикэм ипащэхэм анахьэу анаIэ зытет лъэныкъохэм ащыщых медицинэм иучреждениехэр шIыгъэнхэр ыкIи гъэцэкIэжьыгъэнхэр, къо­джэ псэупIэхэм фельдшер-мамыку IэзапIэхэр ащыгъэпсы­гъэнхэр, аужырэ шапхъэхэм адиштэрэ медицинэ IэпыIэгъум хэхъоныгъэ егъэшIыгъэныр. Карантиным емылъытыгъэу а IофшIэныр блэкIыгъэ илъэсыми шъолъырым щызэпагъэугъэп. Лъэпкъ проектым къыдыхэлъытагъэу 2020-рэ илъэсым сомэ миллион 810-рэ Адыгеим къыфатIупщыгъ. А мылъкумкIэ он­кодиспансерым, республикэ ыкIи мыекъопэ сымэджэщхэм апае медицинэ оборудованиякIэ къа­щэфыгъ. Джащ фэдэу кIэлэцIыкIу сымэджэщым идиагно­сти­ческэ гупчэрэ кIэлэцIыкIу поликлиникэхэмрэ ящыкIагъэхэр арагъэгъотыгъ, ФАП 23-рэ ашIыгъ.

Шъолъыр программэм игъэцэкIэн къыдыхэлъытагъэу медицинэ учреждениехэр ашIыщтых ыкIи ахэм ащыщхэм игъэ­кIотыгъэ гъэцэкIэжьынхэр арашIылIэщтых, хэушъхьэфы­кIыгъэ автомобиль 14 ыкIи мед­оборудованиер ащэфыщт.

Джащ фэдэу медицинэм ­иучреждениехэм Iоф ащызы­шIэщтхэм ягъэхьазырын анахьэу анаIэ зытырагъэтыщт лъэны­къо­хэм ащыщэу къэнэжьы. БлэкIыгъэ илъэсым апшъэрэ еджапIэхэм студенти 118-рэ ащы­рагъэджагъэх, нэбгырэ 64-рэ кли­ническэ ординатурэм агъэ­кIуагъэх. Программэу «Земский доктор» зыфиIорэм ишIуагъэкIэ врач 28-мэ ыкIи фельдшер 23-мэ IофшIэпIэ чIыпIэхэр арагъэгъотыгъэх.

Лъэпкъ проектхэм, респуб­ликэм хэхъоныгъэ ышIынымкIэ унэе программэм, федеральнэ ыкIи ведомственнэ къэралыгъо программэхэм ягъэцэкIэн къадыхэлъытагъэу республикэм Iофышхо щызэшIуахы.

Зэхэсыгъом икIэух анахь чанэу зыкъэзгъэлъэгъогъэ медицинэм иIофышIэ 15-мэ Адыге­им и ЛIышъхьэ ирэзэныгъэ тхылъхэр аратыжьыгъэх. Джащ фэдэу АР-м и Къэралыгъо Совет — Хасэми нэбгырэ 11 къыхигъэщыгъ.