Пэнэшъу Хьазрэт Махьмудэ ыкъор
ТхакIоу ыкIи усакIоу Пэнэшъу Хьазрэт Махьмудэ ыкъом ыныбжь я 87-рэ илъэсым итэу гъэтхапэм и 11-м идунай ыхъожьыгъ.
Теуцожь районым ит къуаджэу Къунчыкъохьаблэ 1934-рэ илъэсым шышъхьэIум и 10-м Хьазрэт къыщыхъугъ. Адыгэ кIэлэегъэджэ училищыр 1954-рэ илъэсым къыухыгъ, икъоджэ гупсэ дэт еджапIэм кIэлэегъаджэу Iоф щишIагъ. Горькэм ыцIэ зыхьырэ Литературнэ институтым 1961-рэ илъэсым чIэхьагъ ыкIи къыухыгъ. Хэку гъэзетхэу «Адыгейская правда», «Социалистическэ Адыгей», нэмыкI чIыпIэхэм ащылэжьагъ.
1957-рэ илъэсым щыублагъэу итхыгъэхэр къыхаутыгъэх.
Хьазрэт ныбжьыкIэу поэзием хэхьагъ. ЗэлъашIэрэ тхакIохэу, усакIохэу И. Гете, Г. Гейне, мыхэм адакIоу дунаим щызэлъашIэрэ А. Пушкиным, Ю. Лермонтовым, А. Твардовскэм яусэхэр адыгабзэкIэ зэридзэкIыгъэх. КIэлэцIыкIухэм афитхыгъэ усэхэр кIэлэцIыкIу IыгъыпIэхэм, еджапIэхэм ащагъэфедэх.
Хь. Пэнэшъур гукъабзэ зиIэу, хьалэлэу, зэфагъэ зыхэлъ адыгэлIэу щытыгъ, арэущтэуи тыгу къинэжьыщт. Тхьэм джэнэт къыритынэу, иIахьыл гупсэхэм аужыпкъэ мафэ афэхъунэу тафэлъаIо.
Къунчыкъохьаблэхэу Мыекъуапэ щыпсэухэрэм яобществэу «Гугъэм» ыцIэкIэ Къэзэнэ Юсыф