Мэкъэе Хьамед Хъалидэ ыкъом идунай зэрихъожьыгъэм фэгъэхьыгъэ къэбар кIэкI бэмышIэу шъуигъэзет къихьэгъагъ. Ащ Iоф дэзышIэщтыгъэхэр щымыIэжьым иунагъо фэтхьаусыхэщтыгъэх. Ащ щыIэныгъэ гъогоу къыкIугъэр сатырэ заулэмэ арыфэн ылъэкIыныя?

Мэкъэе Хьамед къызыщыхъу­гъэ къуаджэу Нэжъыгу пэIап­чъэу псэун фаеу хъугъэми, ицIыкIугъо зыщыкIогъэ, иIа­хьылхэр, иныбджэгъухэр зыдэс чIыпIэ гупсэм ыгукIэ ренэу пэблэгъагъ, ащ къыгъэзэжьыным сыдигъуи кIэхъопсыщтыгъ.

Хьамед бын-унэгъо Iужъум къихъухьагъ, шыпхъуищ иIагъ. Ятэ счетоводэу, почтальонэу щытыгъ, янэ хьалэлэу совхозым щылэжьагъ. КIэлэ чанэу, IофшIэным ыIэ екIоу, нахьыжъхэм IэпыIэгъу афэхъоу ар къэтэ­джыгъ.

Къоджэдэсхэм къызэраIотэ­жьырэмкIэ, Хьамедэ цIыфым ыгу изытетрэ чIыопсым идэхагъэрэ лъэшэу зэхэзышIэрэ творческэ цIыфэу щытыгъ, искусствэм пыхьанэу иныбжьыкIэгъум тыриубытагъ. Поселкэу ПсышIуапэ дэт гурыт еджапIэу N 80-р 1971-рэ илъэсым къызеухым, шапсыгъэ къуаджэу Нэжъыгу щыщ кIалэр Адыгэ музыкальнэ училищым чIэхьагъ. Я 3-рэ курсым ыуж къулыкъу щихьынэу ар дзэм ащагъ. ЕтIанэ илъэсиплI тешIагъэу 1978-рэ илъэсым Мыекъуапэ къыгъэзэжьи, училищыр къыухыжьыгъ.

Зыщеджэгъэ училищым илъэс­­рэ Iоф щишIагъэу Хьамедэ юрист сэнэхьатыр ыIэ къыригъэхьанэу тыриубытагъ. Саратов дэт юридическэ институтыр 1984-рэ илъэсым ащ къыухыгъ, народнэ хъызмэтымкIэ Академиеу Урысые Федерацием и Правительствэ дэжь щыIэм къепхыгъэ институтэу апшъэрэ пэщэ IэнатIэхэр зезыхьэхэрэр зыщагъэхьазырхэрэм щеджагъ.

Мэкъэе Хьамед Джэджэ районым ипрокурор иIэпыIэгъоу щытыгъ, я 90-рэ илъэсхэм яуб­лэгъу Джэджэ РТП-м юрис­консультэу щылэ­жьагъ. 1991-рэ илъэсым ишэкIогъу Краснодар краимкIэ Успенскэ райным ар агъакIо, илъэсым къехъукIэ районым ипрокурор иIэпыIэгъу шъхьаIэу мэлажьэ. 1993-рэ илъэсым ищылэ мазэ Хьамедэ Мыекъуапэ къыгъэзэжьыгъ. Гъэ­хъагъэ хэлъэу IэнэтIэшхохэр зэрихьагъэх — республикэм и Арбитраж хьыкум ихьыкумы­шIэу, Адыгэ Республикэм и Арбитраж хьыкум иквалификационнэ коллегие итхьаматэу, Адыгэ къэралыгъо университетым икIэлэегъаджэу щытыгъ.

Мэкъэе Хьамед хьыкумышI IэнатIэр 2008-рэ илъэсым зегъэтIылъыжьми, къэралыгъо къулыкъумкIэ Темыр-Кавказ академием истудентхэм граждан правэмкIэ лекциехэм къафяджэщтыгъ. Ишъхьэгъусэу Марианнэ Мыекъопэ къэлэ сымэджэщым провизор шъхьаIэу щэлажьэ. ЯкIалэхэу Саидрэ Хъызыррэ тым илъагъо рыкIуагъэх, юридическэ гъэсэныгъэ зэрагъэгъо­тыгъэу ясэнэхьаткIэ Iоф ашIэ.

Урысые Федерацием и Апшъэ­рэ Хьыкум 2020-рэ илъэ­сым щылэ мазэм и 28-м ыштэгъэ унашъомкIэ хэгъэгум ишъо­лъырхэм язэгъэшIужь хьыкумышI 342-мэ яспискэ аухэсы­гъагъ. Адыгэ Республикэм изэгъэшIужь хьыкумышIитфмэ ащыщэу Мэкъэе Хьамеди мы илъэсэу къихьагъэм IофшIэныр ригъэжьэнэу щытыгъ. Ау игъо ифагъэп, илъэс 67-рэ нахь ымыныбжьэу идунай ыхъожьыгъ…

— Хьамедэ бэшIагъэ зысшIэщтыгъэр, аррэ сэррэ шапсыгъэ къэбархэм бэрэ татегущыIэ­щтыгъ, — къысфиIотагъ къуа­джэу Хьаджыкъо щыщэу, илъэсыбэ хъугъэу Мыекъуапэ щыпсэурэ Шъыжъ Хьамед. — Ар цIыф къабзэу щытыгъ, лъытэныгъэ ин фашIыщтыгъ. ПшъэдэкIы­жьышхо зыпылъ IэнатIэхэр ащ зэрихьагъэх, ау игугъу дэйкIэ ашIэу зыкIи зэхэсхыгъэп. Унэгъо пытэ зышIэгъэгъэ, икIалэхэр зылъэ тезыгъэуцогъэ, цIыфхэм хьалэлэу афэлэжьэгъэ Хьамедэ пасэу тхэкIыжьыгъэми, шIушIагъэу иIэмкIэ хэмыкIокIэжьыщт лъэуж дунаим къытыринагъ.

Ныбэ Анзор.