Лъэпкъ проектэу «Демографием» игъэцэкIэн анахь мэхьанэ зиIэ зэфэхьысыжьэу фэхъугъэр сабыеу зидунай зыхъожьыхэрэм япчъагъэ нахь макIэ зэрэхъугъэр ары. Адыгэ Республикэм и ЛIышъхьэ ипресс-къулыкъу къызэритырэмкIэ, мы къэгъэлъэгъонымкIэ Адыгеим я 6-рэ чIыпIэр Урысыем щиIыгъ. Мы илъэсым къыкIоцI сабыеу къагъэнэжьыгъэхэм япчъагъэ нахьыбэ хъугъэ.

Мы лъэныкъомкIэ IофшIэныр нахь дэгъоу зэхэщэгъэным фэшI Адыгэ Республикэм и ЛIышъхьэу КъумпIыл Мурат АР-м псауныгъэр къэухъумэгъэнымкIэ и Министерствэрэ Мыекъопэ къэралыгъо технологическэ университетымрэ пшъэрылъ гъэнэфагъэхэр афишIыгъэх.

- Пандемием гухэлъэу тиIэхэр зэрихъокIыгъэх. ПсынкIэу инфекционнэ госпитальхэр къызэIутхыгъэх, сымаджэхэрэм япчъагъэ къыщыгъэкIэгъэным фэшI ищыкIагъэр зэшIотхыгъ, оборудованиякIэхэр, Iэзэгъу уцхэр зэдгъэгъотыгъэх. Федеральнэ ыкIи республикэ мылъкур, бюджетым къыхэмыхыгъэ ахъщэр ащ пэIудгъэхьагъ. Псауныгъэр къэухъумэгъэным исистемэ нахьышIу шIыгъэным пае тшIэрэм шIуагъэ къызитыщтыр медицинэм иIофышIэхэм зэрифэшъуашэу япшъэрылъхэр агъэцакIэ зыхъукIэ ары, - къыхигъэщыгъ КъумпIыл Мурат.

Абрэдж Сэтэнай.