Шъолъыр зэнэкъокъоу «Къырым игъатх» зыфиIорэр заочнэ шIыкIэм тетэу гъэтхапэм и 15 — 18-м Адыгэ Республикэм щыкIощт.

Къырым ыкIи Севастополь Урысыем къызэрэхэхьажьыгъэ­хэм фэгъэхьыгъэ Iофтхьабзэр Адыгэ Республикэм культурэмкIэ и Министерствэрэ респуб­ликэм лъэпкъ культурэмкIэ и Гупчэрэ зэхащэ.

Къалэхэм, районхэм ятворческэ куп анахь дэгъухэр, орэдыIохэр, сурэтышIхэр, лъэпкъ IэпэIасэхэр, тхыгъэхэм къя­джэхэрэр, нэмыкIхэри зэнэ­къокъум хэлэжьэнхэу къыра­гъэблагъэх.

Къырым ехьылIэгъэ орэдыр анахь дэгъоу къэзыIуагъэхэр, усэхэм, прозэкIэ тхыгъэхэм къяджагъэхэр, сурэтышIхэм яIофшIагъэхэр, фэшъхьафхэр зэхэщакIохэм къыхагъэщыщтых.

Культурэм, искусствэм яIофышIэ цIэрыIохэр, творчествэм пылъхэр осэшI купым хагъэхьагъэх.

УпчIэ зиIэхэр мыщ фэдэ телефонкIэ зэхэщакIохэм афытеохэ хъущт: 8(8772)54-45-56.

— «Къырым игъатхэ» анахь чанэу хэлэжьагъэхэм афэгъэ­хьыгъэ едзыгъохэр гъэтхапэм и 18-м Адыгэ Республикэм культурэмкIэ и Министерствэ инэкIубгъохэм къащыдгъэлъэ­гъощтых, — къытиIуагъ зэхэщэкIо купым хэтэу, республикэм культурэмкIэ и Министерствэ иотдел ипащэу Ацумыжъ Лианэ. — Заочнэ шIыкIэу щытми, я V-рэ зэнэкъокъур гъэшIэгъон хъущтэу сэлъытэ. Хагъэунэ­фыкIырэ чIыпIэхэр къыдэзыхыхэрэм шIухьафтынхэр аратыжьыщтых.

Къырым, Севастополь ягъатхэ зеушъомбгъу, зэкъошныгъэм игъогу мэпытэ. Искусствэм зэфищэхэрэ шъолъырхэм гъатхэр зэдагъэмэфэкIы, ягушIуагъо зэдагощы.

Псэу, лажьэ, Къырым! О уихэхъоныгъэхэм тарэгушхо.

ЕмтIылъ Нурбый.

-