Зэпахырэ узэу дунаир зэлъызыкIугъэм ыпкъ къикIыкIэ гъунэпкъэ гъэнэфагъэхэр зиIэ режимым тызытехьэм ны мылъкум къыхэхыгъэ ахъщэу мазэ къэс унагъом къыфакIорэм игъэпсын пылъ шапхъэхэм зэхъокIыныгъэхэр афэхъугъагъэх. НахьыпэкIэ ар къызэратыщтыгъэу зипIалъэ икIыгъэхэм, икIэрыкIэу тхылъхэр атыжьынхэ имыщыкIагъэхэу, ПенсиехэмкIэ фондым афигъэпсыжьыщтыгъ.

Джы гъэтхэпэ мазэу тызыхэхьагъэм и 2-м къыщыублагъэу, ыпэкIэ зэрэщытыгъэм техьажьых. Унагъом ны мылъкум къыхэхыгъэ ахъщэ тын мазэ къэс къыфэкIоным пае лъэIу тхылъыр ытынэу мэхъу. Ар ПенсиехэмкIэ фондым иинтернет нэкIубгъо щигъэпсыгъэ «унэе кабинетым» е къэралыгъо фэIо-фашIэхэм япортал ащитын ылъэкIыщт, МФЦ-м, цIыфхэм Iоф адэзышIэрэ къулыкъум якIуалIэми Iахыщт.

Шъугу къэдгъэкIыжьын, мы ахъщэ тыныр кIэлэцIыкIум ыныбжь илъэсищ охъуфэкIэ къыфэкIо. Ар ыгъэ­псыным пае илъэс къэс лъэIу тхылъыр унагъом икIэрыкIэу ытыжьын фаеу щыт. Ащ нэмыкIэуи ны-тыхэм ыкIи кIэлэцIыкIум мазэм гъотэу яIэр къэзыушыхьатырэ тхылъхэр ищыкIагъэх.

Арэу щытыми, унагъохэм анахьыбэхэм ар къаушыхьатыжьын имыщыкIагъэу хъугъэ. Мы илъэсыр къызихьагъэм къыщыублагъэу ПенсиехэмкIэ фондым испециалистхэм ежь-ежьырэу унагъом игъот зыфэдизыр зэрагъашIэ. Ащ фэдэ тхылъыр къэзыгъэхьазырын фаеу хъущтыр дзэм къулыкъу щызыхьыхэрэр, къэгъэнэжьакIохэр, полицием е нэмыкI уIэшыгъэ структурэхэм ахэтхэр ары.

Адыгеим щыпсэоу мы ахъщэ тыныр зыгъэпсыгъэхэм сомэ миллион 48-рэ зэкIэмкIи зэхэубытагъэу афатIупщыгъ. Унагъом игъот ащ исым пэпчъ тегощагъэмэ, зы нэбгырэм тефэрэр сомэ 20808-м емыхъурэмэ мы тыныр агъэпсынэу фитыныгъэ яIэ мэхъу. 2021-рэ илъэсымкIэ мазэм унагъом къыфэкIощтыр сомэ 10060-рэ.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.