Непэ нэIуасэ шъузыфэсшIымэ сшIоигъор Гавердовскэ гурыт еджапIэу N 18-м ия 11-рэ класс икIэлэеджакIоу КIэсэбэжъ Хьазрэт.

Хьазрэт еджапIэми, рес­публикэми ащырекIокIырэ зэ­нэкъокъу зэфэшъхьафхэм гуетныгъэшхо иIэу ахэлажьэ ыкIи хагъэунэфыкIырэ чIыпIэ­хэри мызэу, мытIоу къаще­хьых. АдыгабзэмкIи зэнэ­къо­къу зэфэшъхьафхэм ахэлэ­жьэныр лъэшэу икIас. Ана­хьэу зыпыщагъэр усэ тхыныр ары. Непэ адыгабзэмрэ тхыбзэмрэ я Мафэ ехъулIэу иусэ­хэм ащыщхэм нэIуасэ шъуафэсшIымэ сшIоигъу.

Гавердовскэ гурыт еджапIэу N 18-м адыгабзэмкIэ икIэлэегъаджэу Нэныжъ Муслъимэт.

Гъатхэм идэхэгъум

Гъатхэм идэхэгъум сыбзэ къыдэхъугъ, Бзэ зэкIужь, бзэ чаныр лъэшэу шIу слъэгъугъ. КъырыпIон плъэкIыщтым гъунэ ащ имыI, Ным ыбзэ згъэгушхоу сэ сырэгущыI.

Непэ бзэр згъэжъынчэу чIыгум къыздыхэт, Лъэшэу зэрэслъэкIэу гъогушхор есэт, Ныдэлъфыбзэ IэшIур сэри згъэгугъэщт, СырэгущыIэфэ, чIыгум ар тетыщт! Дунаир зэрэдунаеу къысфэзгъэдахэрэр —

СИАДЫГАБЗ

Сыбзэ сиунаеу Сытет тидунае, Сырыгушхонэу Къыситыгъ ар сянэ.

Сиадыгабзэу сидунае КъещэкIыгъ дунаир, Сыгу цIыкIу фэшIоу СырэгущыIэшъу.

«Сыадыг» зыIорэ Пэпчъ сызэрелъэIурэр, — Тиадыгабзэу тиунае ЩерэIэт дунаим!

Таущтэу сымышIэщта адыгабзэр?

Таущтэу сымышIэщта адыгабзэр? Сыбзэ — сидунай сэ, сырэубзэ, Сипкъышъол ыгъатхъэу зэу ар щыщ. ЗэрэслъэкIэу чIыгум щысэгощы.

Ныдэлъфыбзэр непэ сигонэсэу, Тыгъэм фэдэу сэ къысфепсы синэфынэу. Сырэгушхо лъэшэу, сэIо ренэу, — Синасып! — сыфэхъугъэп бзэм сэ хэны!

Таущтэу сымышIэщта адыгабзэр? Силъэпкъышхо, силъэпкъ дышъэ ыбзэ, Сиунагъо щесэгъэдзы лъапсэр, ЩысэIэты сидунай бзэрабзэу!

КIэсэбэжъ Хьазрэт