ЩыIэныгъэм шIуагъэу хэлъыр гукIэ зылъэгъурэ цIыфым ишIэжь уегъэгъуазэ. Хъунэ Аслъан къыIорэм уедэIу зыхъукIэ, псынкIэу зэрэгу­щыIэ­рэм дакIоу, гупшысэ хэхыгъэхэр уигъэшIы­щтыгъэх.

Аслъан Къунчыкъохьаблэ къыщыхъугъ, ау бэрэ щыпсэунэу хъугъэп. Янэ дунаим жьэу ехыжьыгъ. Шэуджэн райо­ным ит интернатым щеджагъ, ылъэ теуцуи, сэнэхьат зэригъэгъотыгъ.

Спортым ыгукIэ зэрэфэщагъэм къы­хэкIэу ащ епхыгъэ IофшIэнхэр ыгъэца­кIэщтыгъэх. Анахьэу ищыIэныгъэ чIыпIэ щызыубытыгъэр футболыр ары.

«Зэкъошныгъэр» ишIэжь лъапI

Мыекъопэ футбол клубэу «Зэкъошныгъэм» иадминистраторэу Хъунэ Ас­лъан илъэс 26-м нахьыбэрэ щытыгъ. Ащ фэдиз уахътэм командэм итренерэу, ешIакIоу Iоф зыдишIагъэмэ япчъагъэ къэлъытэгъошIоп. Арэу щытми, тренер шъхьаIэхэм къащыубла­гъэу бэмэ ацIэ къыриIощтыгъ.

Георгий Безбогиныр, Евгений Ловчевыр, Натхъо Адам, Ешыгоо Сэфэр­бый, фэшъхьафхэри ­илъэс зэфэшъхьафхэм тренер шъхьаIэу щытыгъэх. Пащэхэм бзэ къадэбгъотыныр, уагурыIоныр Iоф къызэрыкIоп. А. Хъунэм ипшъэрылъхэр дэгъоу ыгъэцакIэщтыгъэх. — ТызэгурымыIоу загъорэ къыхэкIыщтыгъэми, Хъунэ Аслъан зэхэщэн Iофыгъохэр дэгъоу зэригъэцакIэщтыгъэхэр тшIогъэшIэгъоныгъ, — къе­Iо­тэжьы клубым ипащэу щытыгъэ Шъхьабэ Сэид.

— Урысыем футболымкIэ изэнэкъо­къоу апэрэ купым щыкIорэм «Зэкъошныгъэр» а лъэхъаным хэтыгъ, — еIо клубым итренер шъхьаIэу Iоф зышIэщтыгъэ Натхъо Адам. — Аслъан уахътэм диштэрэ администраторыгъ.

Футбол ешIакIохэу Анатолий Абрамовым, Нэгъой Юрэ, Натхъо Адам, Тамаз Еник, ЗекIогъу Мурат, Аджинджал зэш­хэм, фэшъхьафхэм А. Хъунэр къатегущыIэ зыхъукIэ, яIэпэIэсэныгъи, ящыIэ­кIэ­-псэукIи гъэшIэгъонэу уащигъэгъуазэщтыгъ.

Аслъан иIофшIэгъухэм афэрэзагъ. СпортымкIэ пащэхэм Датхъужъ Шума­фэрэ Джарымэкъо Юсыфрэ къахигъэщыщтыгъэх. ЦIыфыгъэ, адыгагъэ ахэ­лъэу зэрэзекIохэрэр щысэ фэхъущтыгъэх.

Хэгъэгум футболымкIэ исудья цIэры­Iохэри Мыекъуапэ къакIощтыгъэх. Лъы­тэныгъэ афишIызэ, зэIукIэгъум зэрэфигъэхьазырхэрэр бэмэ агъэшIагъощтыгъ.

Ныбджэгъухэр, нэIуасэхэр

Чъыг закъоу шъофым итым Хъунэ Аслъан фэдагъэп. НыбджэгъушIухэр, нэIуасэхэр иIагъэх. «Зэкъошныгъэр» Израиль ит адыгэ къуаджэу Кфар-Камэ зэкIом, къуаджэм ипащэу щытыгъэ Ацумыжъ Налщык ныбджэгъушIу фэ­хъугъ, Мыекъуапэ къыригъэблэгъагъ, иунэ исыгъ. Ацумыжъ Налщык ыкъоу Айбек Адыге­им къыгъэзэжьыгъ, Мэфэхьаблэ щэпсэу, унагъо иI. Айбекрэ Хъунэ Аслъан ­ыкъоу Муратрэ зэныбджэгъух, зэлъэкIох.

— Хъунэ Аслъан дэгъоу сшIэщтыгъ, — къытиIуагъ Урысыем, Адыгэ Респуб­ликэм язаслуженнэ тренерэу Хъот Юныс. — ГукIэгъу зыхэлъ цIыфышIоу, къэбары­кIэхэм ащыгъуазэу псэущтыгъ. Аслъан икIалэу Мурат самбэмкIэ тренерэу сыриIагъ. ПсынкIэу иIэпэIэсэныгъэ хигъахъощтыгъ, бэнэкIо дэгъу хъун ылъэ­­кIыщтэу слъытэщтыгъ. Мурат футболыр къыхихи, «Зэкъошныгъэм» ия 2-рэ коман­дэ щешIэу зеублэм, самбэм хэкIыжьын фаеу хъугъэ.

Аслъан ишъхьэгъусэу Ритэ адыгабзэм икIэлэегъаджэу Мыекъуапэ Iоф щишIагъ. Адыгабзэр кIэлэеджакIом зэригъэшIэным фэшI унагъомрэ еджапIэмрэ язэпхыныгъэ мэхьэнэ ин иIэу Ритэ елъытэ.

Я 17-рэ училищым Хъунэ Ритэ Iоф щишIэзэ, ригъэджагъэхэм ащыщхэр къы­фэразэхэу макъэ къырагъэIоу бэрэ къы­хэкIыгъ.

Аслъанрэ Ритэрэ ялъфыгъэхэу Бэлэрэ Муратрэ Мыекъопэ къэралыгъо технологическэ университетыр къаухыгъ, Iоф ашIэ, адыгабзэкIэ дэгъоу мэгущыIэх.

Щыгъупшагъэхэп

Аужырэ илъэсхэм Мыекъопэ маши­нэшI заводым, нэмыкIхэм А. Хъунэм Iоф ащишIагъ. А уахътэм спортым ныб­джэгъоу щыриIэхэр щыгъупшагъэхэп. «Зэ­къошныгъэм» иешIэгъухэм яплъыныр, «псэ зыпыт» зэIукIэгъухэм ахэлэжьэныр шэнышIу фэхъугъагъ. Аслъан ышыхэу Руслъани, Юри гукIи псэкIи ыгъэлъапIэщтыгъэх, дахэкIэ ягугъу ышIыныр икIэсагъ. Зэшхэр дэгъоу зэфыщытыгъэх. Хъунэ Аслъан «Адыгэ макъэм» иныбджэгъушIугъ. Гъэзетым зэреджэрэм дакIоу, иеплъыкIэхэри къы­тиIощтыгъ.

Къашъор, орэдыр

Адыгэ къашъор, орэдыр Хъунэ Ас­лъан лъэшэу ыгу рихьыщтыгъэх. Мафэ горэм зэлъашIэрэ артистэу, композиторэу Ан­зорыкъо Чеслав иорэдхэм ащыщ се­дэ­Iузэ, «Адыгэ макъэм» иредакцие къы­чIэхьагъэх Ацумыжъ Налщыкрэ Хъу­нэ Аслъанрэ. Сэлам къахи, Аслъан нэгушIоу къашъом хилъэсагъ. Iэгу тыфытеозэ ар зэрэуджыгъэр зэдгъэпшэщтыр тшIагъэп.

«Налмэсым», «Ислъамыем», «Ошъа­дэм», фэшъхьафхэм яконцертхэм, ­Лъэпкъ театрэм икъэгъэлъэгъонхэм яплъыныр ищыIэныгъэ щыщ хъугъагъэ.

Къин къэптхыныр, ау сыдэу тшIын. ОшIэ-дэмышIэу къэсымаджи, цIыфышIум ыгу къызытемыожьырэр мэфэ 40 мэхъу. Илъэс 65-м къехъугъэу дунаир ыхъожьыгъ. БэгъашIэ мыхъугъэми, цIыфхэм гукIэ алъыIэсын, шIу афишIэн ылъэкIыгъ. Адыгэ мэфэкIхэм зэрахэлажьэщтыгъэр тигукъэкIыжь лъапIэхэм ащыщ.

УишIушIагъэ щыIэныгъэм хэкIокIэщтэп. Угу къытемыожьырэми, уигущыIэ шъабэхэр тхьакIумэм итых, утщыгъупшэщтэп. Тхьэм джэнэт къыует, Аслъан. Уилъэуж зыми хэкIокIэщтэп.