УФ-м ФедерациемкIэ и Совет исенаторхэу мы мафэхэм Адыгеим щыIагъэхэм тыгъуасэ медицинэм ипсэуалъэу республикэм щашIыгъэхэм ащыщхэм ащыIагъэх. Ахэри тишъолъыр социальнэ ыкIи экономикэ хэхъоныгъэхэр егъэшIыгъэнхэм фытегъэпсыхьэгъэ унэе программэм къыдыхэлъытагъэу агъэуцугъэх.

Тыгъоснахьыпэ Теуцожь районым ит къутырэу Шевченкэм щашIыгъэ ФАП-р зэрагъэлъэ­гъугъ, тыгъуасэ Мыекъуапэ къы­щызэIуахыгъэ поликлиникэхэм ащыIагъэх.

АР-м и ЛIышъхьэу КъумпIыл Мурат ипшъэрылъкIэ, Iофэу зэ­шIуахыгъэхэм сенаторхэр къащигъэгъозагъэх АР-м псауны­гъэр къэухъумэгъэнымкIэ иминистрэу Мэрэтыкъо Рустем. Программэм къыдыхэлъытагъэу псауныгъэм икъэухъумэн фэгъэзэгъэ учреж­дение зэхэтыр къалэм ирайонэу анахьыбэ зыщыпсэурэм зэрэща­гъэуцугъэр ащ къыIуагъ. Цэхэм зыщяIазэхэрэ поликлиникэхэмрэ реабилитационнэ гупчэмрэ зы­хэт­хэр блэкIыгъэ илъэсым къызэIуахыгъ. КIэлэцIыкIухэм апае поликлиникэр ащ къыгуашIыхьи, джырэблагъэ къызэIуахыгъ.

Мы учреждениехэр нахьыпэ­кIэ чIыпIэ зэфэшъхьафхэм ащы­Iагъэх, унэу зычIэтхэри жъы хъугъагъэх. Программэм ишIуагъэкIэ лъэхъаным диштэу зэте­гъэ­псыхьэгъэ унэхэм джы ачIэтых, цIыфхэм яфэIо-фашIэхэр икъоу агъэцэкIэшъунхэ амал яIэ хъугъэ.

Медицинэм ипсэуалъэхэр къызакIухьэхэм ыуж, бизнес цIыкIум ыкIи гурытым ащылажьэхэрэм IэпыIэгъу ятыгъэным фэгъэзэгъэ Гупчэу «Мой бизнес» зыфиIорэм сенаторхэр кIогъа­гъэх. Къэралыгъом IэпыIэгъоу къытырэ пстэур икъоу агъэфедэмэ зыщагъэгъозагъ.

Гупчэм ипащэ къызэриIуа­гъэмкIэ, 2020-рэ илъэсэу икIыгъэм фэIо-фэшIэ зэфэшъхьаф миниплIым ехъу ащ щагъэцэ­кIагъ. ЧIыфэу (микрозайм) 210-рэ атыгъ, ар ахъщэкIэ къэплъы­тэмэ, сомэ миллион 548-рэ мэхъу. Джащ фэдэу Адыгеим къыщыдагъэкIырэ продукциеу IэкIыбым щыIуагъэкIырэр нахьыбэ хъуным фэгъэзэгъэ Гупчэу мыщ щагъэ­псыгъэм иIэпыIэгъукIэ предпринимательхэр зэзэгъыныгъэ 18-мэ акIэтхагъэх.

Гупчэу «Мой бизнесыр» къы­хэлажьэзэ, бизнес цIыкIум ыкIи гурытым ащылажьэхэрэм Iэпы­Iэгъу ятыгъэным фытегъэпсыхьэгъэ проектхэм япхырыщын мы­гъэ сомэ миллион 51,5-рэ пэIуагъэхьанэу агъэнэфагъ.