ГъогурыкIонымкIэ шапхъэхэр зыукъохэрэр зэрагъэунэфырэ автоматическэ камерэхэу Адыгэ Республикэм игъогухэм атетхэм илъэсыкIэр къызихьагъэм щегъэжьагъэу хэпшIыкIэу къахэхъуагъ. ГИБДД-м иIофышIэхэм ахэр IэубытыпIэ къызыфашIыхэзэ, гъогурыкIонымкIэ шапхъэхэр зыукъохэрэм тазырхэр зэратыралъхьэрэм ехьылIэгъэ къэбархэр джы псынкIэу къызIэкIагъэхьан алъэкIыщт.

Ащ пае къэралыгъо фэIо-фашIэхэмкIэ портал зыкIэу www.gosuslugi.ru зыфиIорэм зыщарагъэтхын фае. Разделэу «Дополнительные данные» зыфиIорэм транспортым икъэралыгъо регистрационнэ тамыгъэ ехьылIэгъэ къэбархэр, «Документхэр» зыфиIорэ разделым водителым иудостоверение иномер рагъэхьанхэ фае. ГИБДД-м унэшъо гъэнэфагъэ зэриштагъэмкIэ къэбарыр а мэфэ шъыпкъэм къэралыгъо  фэIо-фашIэхэмкIэ порталым къихьащт.

Административнэ тазырхэм яхьылIэгъэ къэбархэр джащ фэдэу Къэралыгъо автоинспекцием иофициальнэ сайтэу http:// www.gibdd.ru зыфиIорэми къехьэх. ГИБДД-м къатырилъхьэрэ тазырхэм ятыжьынкIэ къэралыгъо фэIо-фашIэхэмкIэ портал зыкIыр, Къэралыгъо автоинспекцием иофициальнэ сайт, банк зэфэшъхьафхэм яонлайн-приложениехэр, почтэхэм, банкхэм яподразделениехэр къызфагъэфедэн алъэкIыщт.

Адыгэ Республикэм и Къэралыгъо автоинспекцие цIыфхэм агу къегъэкIыжьы тазыр къазэратыралъхьагъэм фэгъэхьыгъэ къэбарыр игъом къазыIэкIахьэкIэ, апэрэ мэфэ 20-м къыкIоцI тазырым ызыныкъо нахь амыпщыныжьми хъунэу фитыныгъэу яIэр ахэм къызфагъэфедэн зэралъэкIыщтымкIэ.