Къолъхьэ тын-Iыхыным пэуцужьыгъэнымкIэ Адыгэ Республикэм икомиссие изэхэсыгъо Адыгеим и ЛIышъхьэу КъумпIыл Мурат тыгъуасэ зэрищагъ.

Къолъхьэ тын-Iыхын нэшанэ зыхэлъ хэбзэукъоныгъэхэр амышIынхэмкIэ 2020-рэ илъэсым Iофэу ашIагъэр зэхэсыгъом щызэфахьысыжьыгъ, 2021-рэ илъэсымкIэ япшъэрылъ шъхьаIэхэр щагъэнэфагъэх. ЧIыпIэ зыгъэIорышIэжьынымкIэ къулыкъухэр къолъхьэ тын-Iыхыным зэрэпэуцужьыхэрэм епхыгъэ Iофыгъохэм, мы лъэныкъомкIэ хэбзэухъумакIохэм Iофэу ашIагъэм мыщ щатегущыIагъэх.

Адыгэ Республикэм и ЛIышъхьэ коррупцие нэшанэ зиIэ ыкIи нэмыкI хэбзэукъоныгъэхэм апэуцужьыгъэнымкIэ игъэIорышIапIэ ипащэ игуадзэу Дмитрий Тучиным къэралыгъо, муниципальнэ къулыкъушIэхэм мы лъэныкъомкIэ шэпхъэ гъэнэфагъэхэр зэрагъэцакIэрэм игугъу къышIыгъ. Ащ къызэриIуагъэмкIэ, нэбгырэ 14-мэ, анахьэу къоджэ псэупIэхэм ядепутатхэм, хахъоу яIэм ехьылIэгъэ къэбархэр гъэрекIо IэкIагъэ­хьагъэхэп.

«Къолъхьэ тын-Iыхыным пэуцужьыгъэ­нымкIэ хэбзэгъэуцугъэр дэх имыIэу агъэцэкIэн, декларациехэм ятынкIэ пIалъэу щыIэхэр шIокI имыIэу къыдалъы­тэн фае. Семинархэм язэхэщэнкIэ, декларацие Iофтхьабзэхэр зэрагъэцакIэхэрэм гъунэ лъызыфырэ Iофы­шIэхэм яIэпэIэсэныгъэ зыкъегъэIэтыгъэ­нымкIэ Iофэу ашIэрэр агъэлъэшынэу пшъэрылъ афэсэшIы», — къыIуагъ Къум­пIыл Мурат.

Адыгэ Республикэм хэгъэгу кIоцI IофхэмкIэ иминистрэ ипшъэрылъхэр пIалъэ горэкIэ зыгъэцакIэу БрантIэ Мурадин идоклади зэхэсыгъом щедэIугъэх. Ащ къызэриIуагъэмкIэ, къолъхьэ тын-Iыхын нэшанэ зиIэ бзэджэшIэгъэ 59-рэ гъэрекIо зэрахьагъ. БзэджэшIэгъэ 29-мэ афэгъэхьыгъэ Iофхэм язэхэфын аухыгъ. ЧIэнагъэу ашIыгъэм проценти 118-у къырагъэгъэзэжьыгъ.

Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ къызэритыгъэмкIэ, къолъхьэ тын-Iыхын нэшанэ зиIэ бзэджэшIагъэхэр зэрэзэрахьагъэм фэшI нэбгырэ 15-мэ хьапс атыралъхьагъ, уголовнэ Iоф 34-рэ къызэIуахыгъ. Хэбзэ, чIыпIэ зыгъэIорышIэжьынымкIэ къулыкъухэм, организациехэм япащэхэу хабзэм димыштэу зиIофшIэн зэхэзыщэхэрэм ягъогупэ пабзыкIыгъ. Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и Гъэ­IорышIапIэ ипащэу Сергей Каштановым мы лъэныкъомкIэ Iофэу ашIэрэм ыкIи пшъэрылъэу яIэхэм игъэкIотыгъэу къатегущыIагъ.

Къолъхьэ тын-Iыхыным зэрэпэуцужьыхэрэмкIэ чIыпIэ зыгъэIорышIэжьынымкIэ къулыкъухэм яIофхэм язытет фэгъэхьыгъэу Мыекъуапэрэ Адыгэкъа­лэрэ ямэрхэу Андрей Гетмановымрэ ЛIыхэсэ Махьмудрэ зэхэсыгъом доклад къыщашIыгъ.

Адыгеим и ЛIышъхьэ зэхэсыгъом хэлэжьагъэхэм анаIэ джыри зэ тыраригъэдзагъ къэралыгъо, муниципальнэ къулыкъушIэхэм федэу яIэм ыкIи хъар­джэу ашIыгъэхэм яхьылIэгъэ декларациехэр зэраIэкIагъахьэхэрэм гъунэ лъыфыгъэным мэхьанэшхо зэриIэм. Къолъхьэ тын-Iыхын нэшанэ зиIэ бзэджэшIагъэхэр зэрамыхьанхэм фэшI КъумпIыл Мурат пшъэрылъ афишIыгъ къэралыгъо, муниципальнэ къулыкъушIэхэм азыфагу къихъухьэрэ зэмызэгъыныгъэ­хэр къыхэгъэщыгъэнхэмкIэ Iофэу ашIэрэр нахь агъэлъэшынэу.

Адыгэ Республикэм и ЛIышъхьэ ипресс-къулыкъу