«Единэ Россием» иволонтер гупчэрэ НыбжьыкIэ гвардием иактивистхэмрэ зыныбжь хэкIотагъэхэм тхылъхэр зэрафахьыщт Iофтхьабзэр лъагъэкIуатэ.

«Библиотека на дом» зыфиIорэм къыдыхэлъытагъэу волонтерхэм нэжъ- Iужъэу унэм къимыкIырэмэ тхылъхэр аIэкIагъахьэх. Iофтхьабзэр заублагъэм щегъэжьагъэу нэбгыри 100-м ехъумэ закъыфагъэзагъ. Зыныбжь хэкIотагъэхэр къызкIэлъэIухэрэ литературэр унэм афахьы.

— Волонтерхэм тырягъусэу зэхэтщэгъэ Iофтхьабзэр тхылъеджэхэм ашIогъэ­шIэгъон зэрэхъугъэр тигуапэ. Мыщ ишIуагъэкIэ тхылъыкIэу къытIэкIэхьагъэ­хэм зыщагъэгъозэн алъэкIыщт, — къы­Iуагъ АР-м и Лъэпкъ тхылъеджапIэ иIофышIэу Айтэк Рузанэ.

— Зыныбжь хэкIотагъэхэм коронавирусыр къямыутэкIыным пае Iофтхьабзэр зэхэтщагъ. Ежь къалэм щыпсэухэ­рэм тыгу къагъэкIыгъ. Пенсием щыIэ бзылъфыгъэ «линие плъырым» лъэIу иIэу къытеогъагъ. Унэм икIын зэримылъэ­кIырэм къыхэкIэу тхылъеджапIэм тхылъ къыфитхынэу къытэлъэIугъ. Джаущтэу типроект къызэIутхынэу хъугъэ. Классическэ литературэр, тарихъым фэгъэ­хьыгъэр, нэмыкI тхылъ зэфэшъхьафхэр афэтэхьых, — къыIуагъ Урысые общественнэ организациеу «Единэ Россием и НыбжьыкIэ гвардие» и Адыгэ шъо­лъыр къутамэ ипащэу, партийнэ проектэу «Нахьыжъхэр» зыфиIорэм ипащэу, Мые­къуапэ инароднэ депутатхэм я Совет идепутатэу Бэрзэдж Асет.