2009-рэ илъэсым къыщегъэжьагъэу гурыт еджапIэр къэзыухырэ кIэлэеджа­кIохэм шIокI имыIэу зыкI къэралыгъо ушэтыныр илъэс къэс аты. Мы илъэсми зэрифэшъуашэу ар зэрэзэхащэщтым ыуж итых, кIэлэеджакIохэми етIупщыгъэу загъэхьазыры.

— Гурыт еджапIэр къэзыу­хырэ кIэлэеджакIохэм пшъэ­рылъ шъхьаIэу джырэкIэ яIэр зыкI къэралыгъо ушэтынхэм зафагъэхьазырыныр ары. Илъэс зэкIэлъыкIохэм шIэ­ныгъэу зэрагъэгъотыгъэр къы­зыщагъэлъагъо­рэр мы ушэтынхэр ары. Джащ фэдэу я 9-рэ классыр къэзыухыхэрэм къэралыгъо зэфэхьысыжь ат­тестациер акIу. ШIэныгъэу аIэкIэлъхэр къызэрагъэлъагъо­рэм дакIоу социальнэу ыкIи психологическэу щыIэныгъэм зэрэфэхьазырхэр къэлъагъо, — къыщаIуагъ АР-м гъэсэныгъэм­рэ шIэныгъэм­рэкIэ и Министерствэ.

Лъэпкъ проектэу «Гъэсэныгъ» зыфиIорэм къыдыхэлъытэгъэ федеральнэ проектэу «Цифровая образовательная среда» зыфи­Iорэм ишIуагъэкIэ гурыт еджапIэхэм зэрагъэгъотыгъэ интерак­тивнэ компьютер Iэ­мэ-псымэхэр ушэтынхэм зафагъэ­хьазыры­нымкIэ жъугъэу агъэфедэх.

— КIэлэеджакIохэм шIэныгъэу арагъэгъотыщтым дакIоу гъэхъагъэ­хэр ашIынхэм фэщэгъэнхэр ары кIэлэегъа­джэхэм пшъэрылъэу яIэр. Ащ къыхэкIэу ежьхэм ягъэпсыкIи, яIофшIэни зэбла­хъун фае. Творчествэм ылъэныкъокIэ ныбжьыкIэхэм нахь Iоф адэп­шIэн фаеу сэлъытэ. Джащ фэдэу компьютерым хэшIыкI фыряIэнэу, аужырэ шапхъэ­хэм ади­штэрэ технологиехэр агъэфедэнхэм фэгъэсэгъэнхэ фае. Къэралыгъо ушэтынхэм зафагъэхьазырынымкIэ Интернетым ишIуагъэ къэкIо, — еIо Адыгэ республикэ гимназием икIэлэегъаджэу Тхьаркъохъо Ренэ.

ДЕЛЭКЪО Анет.