Урысые Федерацием и Федеральнэ ЗэIукIэ и Къэралыгъо Думэ идепутатэу, «Урысые политикэ партиеу «Единэ Россием» ифракцие хэтэу Хьасанэкъо Мурат общественнэ организациеу «Адыгэ Респуб­ликэм ис бзылъфыгъэ­хэм я Союз» итхьаматэу Ворэкъо Хьалимэт гъэтхапэм и 5-м зэIукIэгъу дыриIагъ.

Бзылъфыгъэ мин пчъагъэ зыхэхьэрэ общественнэ организациер республикэм зыщызэхащагъэр илъэс 26-м къе­хъугъ.

— ЯмэфэкIкIэ бзылъфыгъэ­хэм сафэгушIо. Гъэтхапэм и 8-м медицинэ фэIо-фашIэхэр афэзыгъэцэкIэщт бзылъфыгъэ­хэм анахьэу гущыIэ фабэхэр апэсэгъохы. Ягухэлъхэр къадэ­хъу­нэу, псауныгъэ пытэ яIэнэу, акIуачIэ къыкIимычынэу сафэлъаIо! — къыIуагъ Къэралыгъо Думэм идепутат.

Федеральнэ хэбзэгъэуцум зэIукIэгъум зэрэщыхигъэунэфыкIыгъэмкIэ, Адыгеим ис бзылъфыгъэхэм я Союз общественнэ щыIэныгъэм илъэныкъо пстэуми иIахьышхо ахелъхьэ. Гуфа­кIохэм ядвижение бзылъфыгъэ­хэр нахь чанэу хэлэжьэнхэм ар икIэщакIу, коронавирусыр къызэу­тэлIагъэхэм къадекIокIырэ бзылъфыгъэхэм IэпыIэгъу зэрафэхъущтхэ амалхэм яусэ.

Общественнэ организацием итхьаматэ 2021-рэ илъэсым Iоф зыдашIэщт лъэныкъо шъхьаIэхэм къатегущыIагъ. Ащ зэрэхигъэу­нэфыкIыгъэмкIэ, федеральнэ гупчэми, Къэралыгъо Думэми зэхащэрэ Iэнэ хъураехэм, парламент едэIунхэм нахь чанэу ахэр ахэлажьэхэ ашIоигъу.

— Урысые политикэ партиеу «Единэ Россием» бзылъфыгъэ­хэм я Дунэе мафи, тихэгъэгу ис бзылъфыгъэхэр зыгъэгумэкIырэ Iофыгъохэми лъэшэу ынаIэ атырегъэты. Бзылъфыгъэ­хэм афэгъэхьыгъэ Iофтхьабзэхэр зэрэхэгъэгоу щызэрахьащтых. Республикэм ипащэхэм яIэпыIэгъу ишIуагъэкIэ мы общественнэ организацием илъэс къэс нахь шIуагъэ къытэу иIоф­шIэн зэхещэ, — къыIуагъ парламентарием.

Бзылъфыгъэхэм яорганизацие ыпашъхьэ ит Iофыгъохэм язэшIохын пае зэкIэми акIуачIэ зэрэзэдырахьылIэн фаер зэIукIэгъум щыхагъэунэфыкIыгъ.

Къандор Анзор. Урысые Федерацием и Федеральнэ ЗэIукIэ и Къэралыгъо Думэ идепутат иIэпыIэгъу.