ИлъэситIум ехъугъэу хьафизэхэм я Урысые обществэ и Адыгэ шъо­лъыр организацие итхьаматэу Алексей Хлоповымрэ Адыгэ къэралыгъо университетым социальнэ IофшIэнымкIэ ыкIи зекIонымкIэ икафедрэ икIэлэегъэджэ шъхьаIэу Любовь Манжосрэ зэпхыныгъэ яIэу зэдэлажьэх.

Сэкъатныгъэ зиIэхэм ящыкIэгъэ волонтер IэпыIэгъур арагъэгъотыныр ары пшъэрылъ шъхьаIэр. Мыгъэ щыIэгъэ кIымэфэшхом илъэкI къыгъэлъэгъуагъ, кIэлэцIыкIухэр осымкIэ ыгъэгушIуагъэх, ау ныбжь зиIэхэм гумэкIыгъохэр къафихьыгъэх. Коронавирусым ыпкъ къи­кIыкIэ гъунапкъэу агъэнэфагъэхэр цIыфыбэхэмкIэ къин дэдагъ, зипсауныгъэ зэщыкъуагъэхэм IэпыIэгъу ящыкIэгъагъ.

Университетым иапэрэ курс истудент-волонтерхэр зыхэлэжьэгъэ зэIу­кIэгъу гъэтхапэм и 3-м хьафизэхэм яшъо­лъыр организацие щыкIуагъ. Iоф­шIэнымкIэ IэпэIэсэныгъэу аIэкIэлъымкIэ ахэр къадэгощагъэх. Сэкъатныгъэ зиIэхэм ящыкIэгъэ социальнэ волонтер IэпыIэгъур ягъэгъотыгъэнымкIэ Iофыгъо шъхьаIэу щытхэм ягугъу къашIыгъ: зымылъэгъухэрэм узэрадэгущыIэщт шIыкIэр, ащ шIуагъэу къыхьырэр ыкIи зэрэIэрыфэгъур. Зымылъэгъухэрэм щыIэныгъэм зыкъыхагъотэнымкIэ джырэ техническэ амалэу щыIэхэр, къэгущыIэрэ смартфонхэр ыкIи тхылъхэу флэшкэхэм атетхэр зэрагъэфедэщтыр къагъэлъэгъуа­гъэх. ХэушъхьафыкIыгъэ хэутын ыкIи графическэ журналхэу «Наша жизнь», «Литературные чтения» зыфиIохэу хьафизэхэм я Урысые обществэ къыдигъэ­кIыгъэхэми къатегущыIагъэх.

Адыгэ къэралыгъо университетым социальнэ IофшIэнымкIэ ыкIи зекIонымкIэ икIэлэегъаджэу Любовь Манжос зэрэхигъэунэфыкIыгъэмкIэ, волонтер IэпыIэгъум ухэлэжьэным цIыф нэшанэхэр зэтырегъэуцох, анахьэу гукIэгъу ыкIи щэIагъэ пхэлъынхэм уафепIу. Арышъ, щыIэныгъэ гъогум техьэгъэкIэ ныбжьыкIэ­хэмкIэ волонтерствэм мэхьанэшхо иI.

Хьафизэхэм я Урысые обществэ ичIыпIэ организациеу Мыекъуапэ дэтым итхьаматэу Алексей Хлоповыр.