Бзылъфыгъэхэм я Дунэе мафэ ихэгъэунэфыкIын фэгъэхьыгъэ зэIукIэр Адыгэ Республикэм и Къэралыгъо филармоние тыгъуасэ щы­кIуагъ. Адыгеим и ЛIышъхьэу КъумпIыл Мурат шъолъырым ис бзылъ­фыгъэхэм ямэфэкIкIэ къафэгушIуагъ.

Республикэм пае бзылъфыгъэхэм бэ зэрашIэрэр, анахьэу кIэлэцIыкIухэм япIункIэ ныхэр зэрэзышъхьамысыжьхэрэр рес­публикэм ипащэ ипсалъэ щыхигъэунэфыкIыгъ.

«Ным, кIэлэцIыкIухэм, уна­гъом IэпыIэгъу ягъэгъотыгъэныр къэралыгъо политикэм изы лъэныкъо шъхьаIэхэм ащыщ. Адыгеим ис унагъо пэпчъ щы­IэкIэ-псэукIэ дэгъу иIэнымкIэ, ныхэм IэпыIэгъу ягъэгъотыгъэнымкIэ Iофэу тшIэрэр нахь дгъэлъэшын фаеу ащ къешIы», — къыIуагъ КъумпIыл Мурат.

Адыгэ Республикэм и ЛIы­шъхьэ зэIукIэм къызэрэщыхи­гъэщыгъэмкIэ, бзылъфыгъэхэм со­циальнэ лъэныкъомкIи, къэралыгъом игъэIорышIэнкIи, пред­принимательствэмкIи, общественнэ, творческэ, научнэ щыIэныгъэмкIи, нэмыкI лъэ­ныкъохэмкIи гъэхъэгъэшхохэр ащашIых.

«Медицинэм щылэжьэрэ бзы­лъфыгъэхэм апэрэ чэзыоу гущыIэ фабэхэр непэ апэзгъохы сшIоигъу. Тиврачхэу, медсест­рахэу, медицинэ учреждениехэм ястуденткэхэу коронави­русыр къызэутэлIагъэхэм къадекIокIхэрэм, цIыфхэм ящыIэны­гъэ къэзыгъэнэжьхэрэм тхьа­шъуегъэпсэу ясэIо. Социальнэ лъэныкъом щылэжьэрэ бзылъфыгъэхэми, тиволонтерхэми джащ фэдэу лъэшэу сафэраз», — къыIуагъ республикэм и ЛIышъхьэ.

КъумпIыл Мурат кIэлэегъа­джэу Iоф зышIэрэ бзылъфы­гъэхэми гущыIэ фабэхэр апигъо­хыгъэх. Коронавирусым ыпкъ къикIыкIэ шэпхъакIэхэм зыщатехьэгъэ лъэхъаным кIэлэегъа­джэхэм Iофэу ашIэрэм хэхъуагъэми, яIоф хэшIыкIышхорэ гуе­тыныгъэрэ зэрэфыряIэм къы­хэкIэу еджэным зэпыугъо фэхъугъэп.

«Урысыем и Президентэу Владимир Путиным зэрэхигъэу­нэфыкIыгъэмкIэ, бзылъфыгъэхэм непэ пшъэрылъышхохэм язэшIохын яIахьышIу хашIыхьэ, сабыибэ зэрыс унагъохэм IэпыIэгъу ягъэгъотыгъэным, ныбжьыкIэхэм япIун япхыгъэ проектхэм ягъэцэкIэн чанэу хэла­жьэх. ШъуиIофшIэн хъупхъэу лъыжъугъэкIотэнэу, Владимир Путиным къыгъэнэфэгъэ пшъэ­рылъхэм ягъэцэкIэн чанэу шъу­къыхэлэжьэнэу тышъущэ­гугъы. Iофэу шъушIэрэм АдыгеимкIэ мэхьанэшхо иI. Респуб­ликэм ис бзылъфыгъэхэм ама­лэу яIэхэм зыкъызэIуягъэхы­гъэным тапэкIи тишъыпкъэу тыдэлэжьэщт», — къыIуагъ КъумпIыл Мурат.

ЗэIукIэм икIэух республикэм ихэхъоныгъэ яIахьышхо зэрэхашIыхьэрэм фэшI Адыгеим и ЛIышъхьэ джыри зэ бзылъфыгъэхэм тхьашъуегъэпсэу къариIуагъ, псауныгъэ пытэ, щыIэ­кIэ-псэукIэ дэгъу, насып яIэнэу къафэлъэIуагъ.

ЗэIукIэ ужым республикэм искусствэмкIэ иартистхэмрэ итворческэ коллективхэмрэ къагъэхьазырыгъэ мэфэкI концертыр къатыгъ.