Проектыр зэрагъэцакIэрэм тегущыIагъэх
Урысые Федерацием шъолъыр хэхъоныгъэмкIэ и Правительственнэ комиссие ипрезидиум изэхэсыгъо тыгъуасэ щыIагъ. Видеоселектор шIыкIэм тетэу зэхащэгъэ Iофтхьабзэр зэрищагъ УФ-м и Премьер-министрэ игуадзэу Марат Хуснуллиным.
Ащ хэлэжьагъэх министерствэхэм, федеральнэ къулыкъухэм ыкIи ведомствэхэм, шъолъырхэм япащэхэр. Адыгеир къэзгъэлъэгъуагъэр республикэм и ЛIышъхьэу КъумпIыл Мурат.
Лъэпкъ проектхэр ыкIи къэралыгъо программэхэр чIыпIэхэм зэращагъэцакIэхэрэм М. Хуснуллиныр къытегущыIэзэ бюджет ахъщэр зэрагъэфедэрэм шъолъырхэм япащэхэр лъыплъэнхэм мэхьанэшхо зэриIэр хигъэунэфыкIыгъ. Мы илъэсымкIэ агъэнэфэгъэ Iофтхьабзэхэр зэкIэ гъэцэкIэгъэнхэм анахьэу анаIэ тырагъэтынэу къариIуагъ. Джащ фэдэу псэупIэхэр нахь псынкIэу шIыгъэнхэм, инфраструктурэр зэтегъэпсыхьэгъэным фэIорышIэрэ программэу «Стимул» зыфиIорэм, нэмыкIхэм къадыхэлъытэгъэ Iофтхьабзэхэр чIыпIэхэм зэрифэшъуашэу ащагъэцэкIэнхэ зэрэфаем къэзэрэугъоигъэхэм анаIэ тыраригъэдзагъ.
Ащ нэмыкIэу зэтырагъэпсыхьащт объектхэм якъыхэхын фытегъэпсыхьэгъэ мэкъэтыным шъолъырхэр чанэу хэлэжьэнхэм мэхьанэшхо зэриIэр УФ-м ивице-премьер къыхигъэщыгъ. Ар Урысыем псэолъэшIынымкIэ и Министерствэ ихэушъхьэфыкIыгъэ сайтэу «htt:/1.gorodsreda.ru» зыфиIорэм жъоныгъуакIэм и 26-м щегъэжьагъэу и 30-м нэс щыкIощт.
Лъэпкъ проектэу «ПсэупIэр ыкIи къэлэ щыIакIэр» зыфиIорэр республикэм щыгъэцэкIагъэ зэрэхъурэм къытегущыIагъ Адыгеим и ЛIышъхьэу КъумпIыл Мурат. Ащ къызэрэхигъэщыгъэмкIэ, блэкIыгъэ илъэсым шъолъырым псэупIэ квадратнэ метрэ мин 258-рэ щатыгъ, мы илъэсымкIэ гухэлъэу щыIэр —квадратнэ метрэ мин 300 фэдиз. Илъэси 5-м къыкIоцI фэтэрыбэу зэхэт уни 150-рэ ашIынэу ащ фэгъэзэгъэ организациехэм фитыныгъэ 59-рэ аратыгъ. Адыгеим социальнэ-экономикэ хэхъоныгъэ ышIынымкIэ унэе программэм игъэцэкIэн къыдыхэлъытагъэу сабыибэ зэрыс унагъохэм къаратыгъэ чIыгу Iахь мин 1,8-рэ фэдизмэ инфраструктурэр ащагъэпсынымкIэ проектнэ-сметнэ документациер агъэхьазырыгъ.
ПсэупIэхэм яшIынкIи, лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр», федеральнэ проектэу «Псы къабз» зыфиIохэрэм ягъэцэкIэнкIи республикэм гъэхъэгъэшIухэр зэриIэхэр Марат Хуснуллиным къыхигъэщыгъ.
Адыгэ Республикэм и ЛIышъхьэ ипресс-къулыкъу