Адыгеим и ЛIышъхьэу Къум­пIыл Мурат Адыгэ Рес­публикэм финансхэмкIэ иминистрэ зэрагъэнафэ­рэм ехьы­лIэгъэ Указым ты­гъуасэ кIэт­­хэжьыгъ.

Муниципальнэ образованиеу «Къалэу Мыекъуапэ» финансхэмкIэ игъэIорышIапIэ пэщэныгъэ дызезыхьэгъэ Виктор Орловыр ары а IэнатIэм Iуа­гъэхьагъэр. Ащ ыпэкIэ Адыгэ Республикэм финансхэмкIэ иминистрэ IэнатIэ илъэсыбэрэ зезыхьагъэр Долэ Долэтбый.

Хэбзэгъэуцугъэм зэрэщы­гъэнэфагъэм тетэу Адыгеим финансхэмкIэ иминистрэ IэнатIэ Iуагъэхьащтым икандидатурэ къэзыгъэлъэгъуагъэр АР-м и Премьер-министрэ ары. Геннадий Митрофановым КъумпIыл Мурат Виктор Орловым икандидатурэ къызэрэдыригъэштагъэмкIэ зэрэфэразэр, минист­ракIэм иIоф хэшIыкIышхо зэрэфыриIэр, УФ-м финансхэмкIэ и Министерствэ тестхэр ащ зэ­рэщырагъэкIугъэр къы­Iуагъ.

Адыгеим и ЛIышъхьэ респуб­ликэм финансхэмкIэ иминист­ракIэ тыгъуасэ зыIокIэм, пэщэныгъэ зыдызэрихьащт Министерствэм пшъэрылъэу иIэхэм ащигъэгъозагъ. АР-м и Правительствэ финансхэмкIэ иIофшIэн мэхьанэшхо зэриIэр, цIыфхэм ящыIэкIэ-псэукIэ зыкъегъэIэтыгъэнымкIэ республикэм пшъэ­рылъэу иIэхэр гъэцэкIагъэ зэ­рэхъущтхэр ащ бэкIэ зэрелъытыгъэр КъумпIыл Мурат къыхигъэщыгъ.

«Урысыем и Президентэу Владимир Путинымрэ УФ-м и Правительствэрэ яIэпыIэгъу ре­нэу зыхэтэшIэ. Федеральнэ, республикэ бюджетхэм ямылъку стратегическэ пшъэ­рылъхэмрэ зигъо Iофыгъохэмрэ язэшIохын пэIохьэ. Финанс хэукъоныгъэхэр тшIы хъухэщтэп», — хигъэунэфыкIыгъ КъумпIыл Мурат.

Финанс дисциплинэм игъэпытэнкIэ, бюджет планирова­ниемкIэ, Адыгэ Республикэм ибюджетхэр зэдиштэнхэмкIэ, Адыгеим ибюджет ежь ифедэхэм зыкъягъэIэтыгъэнымкIэ Iо­фэу ашIэрэр зэрагъэлъэшын фаер Адыгеим и ЛIышъхьэ къы­хигъэщыгъ.

«Адыгэ Республикэм финанс­хэмкIэ и Министерствэ АР-м экономикэ хэхъоныгъэмрэ сатыумрэкIэ и Министерствэ Iофэу дишIэрэр ыгъэлъэшын, бюджетхэм нахьыбэу хахъо яIэным пае МинистерствитIуми экономикэм ренэу анаIэ тырагъэтын фае. Ахэм Iоф зэрэзэдашIэрэм шIуа­гъэу къытырэр лъэпкъ проектхэр, къэралыгъо программэхэр, Адыгэ Республикэм социальнэ-экономикэ хэхъоныгъэ зэришIыщт унэе программэр зэрагъэцакIэхэрэм къахэщын фае», — хигъэунэфыкIыгъ ­КъумпIыл Мурат.

Цыхьэ къызэрэфишIыгъэм пае Адыгеим и ЛIышъхьэ зэ­рэфэразэр, КъумпIыл Мурат къыгъэнэфэгъэ пшъэрылъхэм язэшIохын фежьэнэу зэрэхьазырыр Виктор Орловым къы­Iуагъ.

Орлов Виктор Николай ­ыкъор Мыекъопэ районымкIэ поселкэу Тульскэм 1977-рэ илъэсым тыгъэгъазэм и 24-м къыщы­хъугъ, «финансхэмрэ кредитымрэкIэ экономист», «промышленнэ, граждан псэолъэшIы­ным­кIэ инженер» зыфиIорэ сэнэ­хьатхэр Мыекъопэ къэралыгъо технологическэ университетым ыIэ къыщыригъэхьагъэх. Эко­номикэ шIэныгъэхэмкIэ кандидат. Мыекъопэ районым ихьа­къулахь инспекцие IофшIэныр щыригъэжьагъ. Къалэу Мые­къуапэ иадминистрацие, Адыгэ Республикэм финансхэмкIэ и Министерствэ IэнэтIэ зэфэшъхьафхэр ащызэрихьагъэх. Мые­къуапэ иадминистрацие финансхэмкIэ игъэIорышIапIэ ипащэ игуадзэу 2012-рэ илъэсым, ащ ипащэу 2015-рэ илъэсым агъэ­нэфагъ.

Адыгэ Республикэм и ЛIышъхьэ ипресс-къулыкъу