Джырэ дунаим псынкIэу зызэрехъокIы, тищыIакIэ нахь Iэрыфэгъу мэхъу. Ау анахь техническэ къэугупшысыгъэ инхэми цIыф зэфыщытыкIэхэр агъэпсынхэ афызэшIокIырэп. ЦIыфым игъэпсыкIэкIэ сыдигъуи зэрэщытыр — гущыIэгъу зыфэхъун, игупшысэхэр зэхэзышIыкIын, зынаIэ къытетын ищыкIагъэх.

Мы къэтпчъыгъэхэм анахьэу ащыкIэхэрэр зыныбжь хэкIотагъэхэр арых. Мыщ къегъэнафэ социальнэ IофышIэм исэнэхьат мэхьанэшхо зэриIэр. Мы лъэны­къом Iоф щызышIэрэм зэхэдз имыIэу IэпыIэгъу зищыкIэгъэ цIыфхэм ыгу афызэIухыгъэу афыщытын фае. Джары зэрилъы­тэрэр цIыфхэм яфэIо-фашIэхэр афызыгъэцэкIэрэ Гупчэу Гъобэ­къуае дэтым ипащэу Уджыхъу МулиIэт. Илъэс 25-рэ хъущт ар социальнэ IофшIэным зыхэтыр ыкIи дэгъоу къыгурэIо зыныбжь хэкIотагъэхэм фыщытыкIэу афыриIэн фаер.

— СиIофшIэн езгъажьэ зэ­хъум ар зэрэмыпсынкIэр, кIуа­чIэ зэрищыкIагъэр къызгурыIощтыгъ, — къеIуатэ МулиIэт. — Ащ дакIоу, шэнышIоу, гукIэгъушIэу сызэрэщытын фаер апэрэ чIыпIэм згъэуцущтыгъ. Сыдигъуи нэжъ-Iужъхэм сагу­рэIо, екIо­лIэкIэ гъэнэфагъэ къафэсэгъоты. А зэпстэур къыз­дэзгъэхъугъэу слъытэрэр сиIэпыIэгъу ящыкIагъэу къызэрэсажэхэрэр ары.

Къуаджэм дэсхэр зэкIэ зэрэшIэх нахь мышIэми, нэжъ-Iужъхэм цыхьэ къызфябгъэшIыныр IэшIэхэп. Игъорыгъоу лъыкIуа­тэзэ, МулиIэт социальнэ Iоф­шIакIэм ишъэфхэр къызIэкIигъэ­хьагъэх ыкIи ипшъэрылъхэр чанэу зэригъэцакIэрэм ишIуагъэкIэ цIыфхэм ясоциальнэ фэIо-фашIэхэр афэзыгъэцэкIэрэ Гупчэу Гъобэкъуае дэтым ипащэу агъэнэфагъ. Ау ащ къикIырэп тигущыIэгъу зы чIыпIэ исэу Iоф ышIэу. ЦIыфхэм яфэIо-фа­шIэхэр зэрафагъэцакIэхэрэм ар лъэплъэ, иIэпэIэсэныгъэкIэ иIофшIэгъухэм адэгуащэ. Тина­хьыжъхэр агъэрэзэнхэр, агъэгушIонхэр, ящыкIагъэр арагъэгъотыныр япшъэрылъ шъхьаIэу зэрэщытыр агурегъаIо.

— Мы уахътэм ехъулIэу гуп­чэм нэбгырэ 14 щэлажьэ, — къеIуатэ Уджыхъу МулиIэт. — Ахэм нэбгыри 104-мэ IэпыIэгъу арагъэгъоты. Нэбгырэ 16-р яза­къоу къэнагъэх, 88-м Iа­хьылхэр яIэх, ау язакъоу мэп­сэух, 21-мэ — сэкъатныгъэ яI. Пандемием ыпкъ къикIыкIэ зыныбжь хэкIотагъэхэр унэхэм арысынхэ фае зэхъум, зэпыу тимыIэу Iоф тшIагъэ, тфэлъэкIыщтымкIэ ахэм агу къызэрэдэтщэещтым тыпылъыгъ. Анахь къызэрыкIо мафэми афагъэцэкIэрэ IэпыIэгъум хэ­хьэх нэжъ-Iужъхэм ящыкIэгъэ гъомылапхъэхэр игъом ягъэгъо­тыгъэнхэр, унэм, щагум якъэбзагъэ лъыплъэгъэныр, коммунальнэ фэIо-фашIэхэм ауасэ атынымкIэ адеIэгъэныр, Iэзэгъу уцхэр къафэщэфыгъэнхэр, нэмыкIхэри.

Шъхьэзэкъоныгъэм нахь хьылъэ щыIэп къысшIошIы. Ар етIани ныбжьыр зыхэкIуатэкIэ, цIыфым зыфишIэжьын ылъэкIырэм къыщэкIэшъ нахь къин хэфэ. ГухэкI нахь мышIэми, ар нэбгырэ пэпчъ къехъулIэн ылъэ­кIыщт. Мы купым хахьэхэрэм пкъэоу, IэубытыпIэу дунаим щыряIэ хъурэр социальнэ Iофы­шIэр ары. А сэнэхьатыр къыхэзыхырэм цIыфым илыуз зэхи­шIыкIынэу зэрэщытыр тигущыIэгъу къыхигъэщыгъ. Джа еплъыкIэр зыдиIыгъэу илъэс пчъагъэ­хэм къакIоцI щытхъу хэлъэу иIоф егъэцакIэ.

IофшIэн закъор арэп цIыфым ищыIэныгъэ зэрэзэхэтыр. Уджыхъу МулиIэтрэ ишъхьэгъу­сэу Юрэрэ сабыищ зэдапIугъ. Джы пхъорэлъфитIумэ ямафэхэр къафагъэчэфых. МулиIэт бэмы­шIэу юбилей иIагъ, ащ ыныбжь илъэс 50 хъугъэ. А гушIуагъор иIэхьыл гупсэхэм дагощыгъ. Гъатхэм имэфэкI дахэкIэ ащ тыфэгушIо, псауныгъэрэ гушIуа­гъорэ щымыкIэу бэрэ щыIэнэу тыфэлъаIо. Iэшъынэ Сусан.