МэфэкIэу гъэтхапэм и 8-м бзылъфыгъэхэу зиIофшIэн гъэшIэгъонхэм, къинхэм ягугъу къэтшIы хабзэ. Полицейскэ сэнэхьат мыпсынкIэр къыхэзыхыгъэ ЖэнэлI Сусанэ нэIуасэ шъуфэтшIыщт.

Ар гъогурыкIоныр щынэгъончъэнымкIэ Адыгеим и Къэралыгъо автоинспекцие пропагандэмкIэ иотдел иинспектор, полицием имайор. Мы сэнэхьатыр къыхэзыхырэ пстэури зы нэшан зэзыпхыхэрэр — сыд фэдэрэ къиныгъуи емылъы­тыгъэу яIоф­шIэн фэшъыпкъэнхэр, цIыфхэм афэлэжьэнхэр.

Мы бзылъфыгъэ нэшIо-гушIом шъуашэр щымыгъэу узеплъыкIэ, полицием хэтэу пшIэхэнэп. Рэхьатэу, дахэу мэгущыIэ. ЦIыф куп зэфэшъхьафхэм ар чанэу адэлажьэ. Гъогу фыкъоныгъэхэр нахь макIэ шIыгъэнхэм фытегъэпсыхьэгъэ IофшIэн къызэрыкIоп мыщ ыгъэцакIэрэр.

ПропагандэмкIэ инспекторэу Iоф зишIэрэр бэшIагъэп нахь мышIэми, иIофшIэгъухэм акIырыплъызэ IэпэIэсэныгъэ къызIэкIи­гъэхьагъ.

— Мы отделым сызыщыIэр илъэси 5 хъугъэ, ау къулыкъур зысхьырэр бэшIагъэ, — къеIуатэ ЖэнэлI Сусанэ. — 1994-рэ илъэсым дзэ частым сиIофшIэн щезгъэжьагъ. Нэужым 2003-рэ илъэсым АР-м хэгъэгу кIоцI IофхэмкIэ и Министерствэ къэ­бархэмкIэ игупчэ сыкIожьи, илъэс 12 Iоф щысшIагъ. 2015-рэ илъэсым пропагандэмкIэ отделым зыкъэзгъэзэжьыгъ. Апэрэ уахътэм IофшIэнымкIэ сымышIэщтыгъэр бэ, ау игъорыгъозэ пстэури къызIэкIэзгъэ­хьагъ, ащкIэ сиIофшIэгъухэм яшIуагъэ къысагъэкIыгъ.

ТигущыIэгъу ищыIэныгъэ апэ кIэлэегъэджэ сэнэхьатым рипхы­гъагъ. Адыгэ къэралыгъо университетым филологиемкIэ ифакультет къыухи, илъэси 3-рэ кIэлэегъа­джэу Iоф ышIагъ. Ау сыдигъуи ыгукIэ мы сэнэхьатыр зыдиIы­гъыгъ.

— Апэ сызфеджэгъэ кIэлэегъэджэ сэнэхьатым зыщысыушэтынэу игъо сифагъ, ау сищыIэныгъэ ащ зэресымыпхыщтыр къызгурыIуагъ, — еIо Сусанэ. — Сыдигъуи шъуашэр, хабзэр, дисциплинэр, общественнэ IофшIэныр сикIасэх. А зэпстэур къыдэслъыти, юридическэ гъэсэныгъэ зэзгъэгъотыжьыгъ.

Джы тигущыIэгъу ыгукIэ зы­фэе IофшIэныр егъэцакIэ, ащ гухахъо хегъуатэ. КIэлэегъэджэ сэнэхьатэу зэригъэгъотыгъэри непэ иIофшIэн щигъэфедэн елъэкIы. Сыда пIомэ гъогурыкIоныр щынэгъончъэным фэIорышIэрэ пэшIорыгъэшъ Iофтхьэбзэ зэфэшъхьафхэр гъэсэныгъэм иучреждениехэм, кIэлэцIыкIу зыгъэпсэфыпIэхэм, водительхэм ыкIи лъэсрыкIохэм афызэхещэх. Щынэгъончъэу гъогум зэрэщызекIощтхэр яцIыкIугъом къыщегъэжьагъэу сабыйхэм ябгъэшIэн фаеу инспекторым елъытэ.

Сусанэрэ ишъхьэгъусэрэ пшъашъэрэ кIалэрэ зэдапIу. Данэ Пшызэ къэралыгъо университетым иархитектурнэ факультет щеджэ. Айдэмыр Адыгэ республикэ гимназием щеджэ, я 9-рэ классым ис. ТигущыIэгъу ищыIэныгъэкIэ непэ къыдэхъугъэм рыраз.

ЖэнэлI Сусанэ ыцIэкIэ бзылъфыгъэ пстэуми гъэтхэ мэфэкIымкIэ тафэгушIо. Насыпрэ, псауныгъэрэ, гушIуа­гъорэ къябэкIыхэу щыIэнхэу тафэлъаIо.

Iэшъынэ Сусан.