НыбжьыкIэхэм япIун фэIорышIэ
Инспектор ныбжьыкIэхэм яотрядхэр (ЮИД) зызэхащагъэр гъэтхапэм и 6-м илъэс 48-рэ мэхъу. Мы движением игъэпсын ыкIи республикэм хэхъоныгъэ щишIыным зиIахьышIу хэзылъхьагъэхэм, отрядхэм ахэтыгъэхэм ыкIи джы ахэтхэм, педагогхэм сафэгушIо!
ГъогурыкIоным хэлэжьэрэ ныбжьыкIэ цIыкIухэм ящыIэныгъэ ыкIи япсауныгъэ къызэтегъэнэгъэныр, гъогум щынэгъончъэу зэрэщызекIощтхэ шIыкIэр агурыгъэIогъэныр, яцIыкIугъом къыщегъэжьагъэу гъогум телъ культурэм фэпIугъэнхэр — къэралыгъом ыкIи обществэм япшъэрылъ шъхьаIэх. КIэлэцIыкIухэм ыкIи Iэтахъохэр зыхэфэрэ хъугъэ-шIагъэхэр къэмыгъэхъугъэнхэм зиIахьышIу хэзылъхьэхэрэм рэзэныгъэ гущыIэхэр афесэгъэхьых.
Мы уахътэ ехъулIэу Адыгэ Республикэм игурыт еджапIэхэм ЮИД отряди 146-рэ ащызэхэщагъ, ахэм ясатырхэм кIэлэцIыкIу 2000-м ехъу ахэт, IофшIэныр зыгъэIорышIэрэр Адыгеим и Къэралыгъо автоинспекцие икъулыкъу. Сицыхьэ телъ тапэкIи мы отрядхэр зэрэпытэщтхэм, гупшысэ чанхэр зэрэпхыращыщтхэм, ясатыр цIыфыбэ къызэрэхащэщтхэм.
Адыгеим и Къэралыгъо автоинспекцие движением ищыкIэгъэ IэпыIэгъур ригъэгъотыным фэхьазыр. ЯцIыкIугъом къыщегъэжьагъэу щыIэныгъэр къызэтегъэнэгъэнымкIэ пшъэдэкIыжьэу ахьырэр загурыдгъаIокIэ, тапэкIэ къэкIощт уахътэм хэбзэукъоныгъэхэр зымышIыхэрэ ныбжьыкIэхэр тигъогухэм атетлъэгъощтых.
АР-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и Къэралыгъо автоинспекцие АдыгеимкIэ и ГъэIорышIапIэ ипащэу, полицием иполковникэу Александр Курпас.