Къэгъагъэхэр аратыгъэх
Бзылъфыгъэхэм я Дунэе мафэ ипэгъокIэу Мыекъуапэ, Адыгэкъалэ ыкIи Тэхъутэмыкъое районым ащыIэ тхын-ушэтын отделхэм япащэхэм машинэ зефэныр езыгъэжьэщтхэм фитыныгъэ къязытырэ тхылъхэм къэгъагъэхэр ягъусэхэу аратыжьыгъэх.
«Цветы для автоледи» зыфиIорэм мыр къыдыхэлъытагъ. Ащ епхыгъэу Мыекъуапэ щыкIогъэ Iофтхьабзэм АР-м хэгъэгу кIоцI IофхэмкIэ и Министерствэ и Общественнэ совет илIыкIоу Анатолий Коробовыр хэлэжьагъ.
Бзылъфыгъэхэу ушэтынхэр дэгъоу зытыхи, зефэнымкIэ фитыныгъэм итхьапэ къаIызыхыжьынэу къэкIуагъэхэм дахэу къазэрапэгъокIыгъэхэр ягуапэ хъугъэ. МРЭО-у N 1-м ипащэу ГъукIэлI Теуцожь ахэм къафэгушIуагъ, гъэтхэ къэгъагъэхэр, открыткэхэр къаритыгъэх.
Бзылъфыгъэхэр гъогум щысакъынхэу, шапхъэхэр шIокI имыIэу агъэцэкIэнхэу, гъогурыкIоным хэлэжьэрэ пстэуми лъытэныгъэ афашIынэу закъыфагъэзагъ.
Бзылъфыгъэхэр инспекторхэм къафэрэзагъэх, гъогурыкIоным ишапхъэхэр зэрагъэцэкIэщтхэр къаIуагъ.